Diadomingo awor, containers pa desperdicio na San Nicolas

ORANJESTAD - Relaciona cu e proyecto Milieustraat, Aruba Tourism Authority y Serlimar ta recorda cu diadomingo awor, 22 di november, lo bai tin e containernan disponibel dilanti ex Lucky Store na San Nicolas (tereno habri). E horario lo ta di 8’or di mainta pa 2’or di atardi. Riba tur diadomingo di november, ATA y Serlimar lo ta den e districtonan mas grandi di Aruba, ofreciendo tur cas den nos comunidad e oportunidad di prepara y haci limpiesa pa fin di aña. Probecha y no warda te ultimo ora pa cuminsa cu e limpiesa mas grandi di aña!

Milieustraat

Cu e generoso sosten di ATA, dicho proyecto lo wordo ehecuta door di Serlimar den e concepto di un “milieustraat” of “caya di medio ambiente”. En breve, esaki ta ensera e deposito separa di materialnan di desperdicio den nan respectivo container. Pues deposita e siguiente tipo di desperdicio separa den nan container, esta: desperdicio di construccion/mata, desperdicio di cas general y artefactonan di metal (wasmachine etc). Lo ta bai tin opzichternan presente na tur momento, specialmente pa dirigi y asistibo den esaki y nos ta conta cu e cooperacion di un y tur.

Tips pa preveni dengue y Chikunguya tambe na Milieustraat

Gele Koorts en Muskietenbestrijding tambe lo bai ta presente pa suministra informacion di prevencion di dengue na publico. Ta temporada di awacero atrobe pues ta e momento pa controla cada skina di bo cas of cura pa mira si tin criadero. Elimina criadero door di haci limpiesa na cas y den bario y ricibi bo tipnan valioso directamente di GKMB. Alaves nan lo ta inspecionando e bario mes tambe pa posibel criaderonan. Pa mas informacion, comunica libremente na 5245080 of busca nos riba facebook.