Casa Cuna ta anuncia su tremendo Christmas Bazaar riba 28 di november awor

ORANJESTAD- Stichting Casa Cuna Progreso (SCCP) ta anuncia nan tradicional Christmas Bazaar cu ta tuma luga e aña aki den luna di november. E meta di e bazaar aki ta na promer lugar pa yuda recauda fondo pa logra yega na un bus nobo pa transporta e muchanan pa scol, nan actividadnan, dokter, etc. SCCP ta un internado pa muchanan entre 0-8 aña cu su meta ta pa cuida y guia muchanan cu pa un of otro motibo no por biba na cas y pa duna sosten temporal den guia di e mayornan.

Trahadonan y boluntarionan a uni pa organisa un biaha mas nan bon conoci Christmas Bazaar cual lo tuma luga e aña’ki riba diasabra 28 di november for di 4’or di atardi pa 9’or di anochi. Portanan di Casa Cuna lo habri pa ricibi bishitantenan cu kier contribui di e forma aki cu e trabou cu e Stichting ta realisa na bienestar di un grupo di mucha cu mester haya e cuido necesario. Manera ta un tradicion ta bay tin e famoso mercado di purga cu diferente articulonan pa baby, mucha y hende grandi na prijs di baca flaco. Tambe ta bay tin na benta cuminda cu un menu di pasco manera calacuna, ham di pasco hunto cu aroz y berdura. Pa esnan cu ta interesa y kier cumpra nan ticket tempran, por pasa na Casa Cuna entre 8or di mainta pa 6 or di atardi, tambe lo tin snacks, bolo y hopi mas. Na Bar ta ofrece refresco, awa y juice. Lo bay tin Kid’s Corner, Huki di Amigo nan di Casa Cuna, Health Corner, Candy Corner, Gift Corner y nan tremendo rifa cu diferente premionan.

Tur esnan cu cumpra ticket pa e premionan grandi mester corda cu nan mester ta presente pa por reclama e premio. Durante henter e evento lo bay tin musica di DJ y Gaita pa hinca tur e bishitantenan den ambiente di Pasco. Esaki ta un bon oportunidad pa ciudadanonan cera conoci cu e trabou cu ta wordo haci na Casa Cuna, cu ta un stichting cu ta depende pa un gran parti riba donacion di comunidad.

Den e Huki di Amigonan di Casa Cuna por haya informacion con un ciudadano por yuda cu un contribucion of apoyo pa haci un diferencia den bida di e muchanan. Esaki no necesariamente mester ta un contribucion financiero, pero na e Huki aki lo duna tur informacion necesario. Directiva di Stichting Casa Cuna ta manda un invitacion na henter pueblo di Aruba, pa reserva algun ora riba e fecha di 28 di november, pa bishita e famoso Christmas Bazaar di Casa Cuna hunto cu famia.