Atia preocupa cu declaracionan contradictorio riba introduccion ABB

ORANJESTAD - ATIA a tuma nota di e diferente declaracionan contradictorio encuanto e introduccion di e ABB. Di un banda minister Bermudez ta informa na parlamento e introduccion di e ABB y na e otro extremo premier Eman ta desmenti esaki, treciendo asina confusion y incertidumbre den nos comunidad.

TRAYECTO DI REFORMA

E trayecto di e reforma fiscal, cual ABB ta un parti di dje, tin mas cu 2 aña andando unda expertonan a hinca hopi tempo y energia pa yega na un sistema di belasting mas simpel hunto cu un compliance rate mas halto. Alaves e lo a haci Aruba un pais mas atractivo pa inversionista y por ultimo e lo a alivia e ciudadano den su poder di compra door di elimina e diferente schakkel di BBO, pero mas importante lo a baha e peso di impuesto door di cambia e tabelnan di inkomstenbelasting asina treciendo mas placa den cartera di cada un.

INTRODUCCION

ATIA semper a sostene e pensamento aki, cu e condicion cu e lo wordo introduci completo y cu tur e beneficionan menciona ariba ta parti di dje. Nunca ta e intencion pa introduci parcialmente of solamente e parti cu ta conveni gobierno, esta e entradadanan. Primordial ta e parti di e alivio pa tanto comercio y e ciudadano en general. Mas placa tur hende tin den cartera mas placa lo circula den nos economia tambe. ATIA semper a sostene y vocifera e pensamento esaki na gobierno durante e presentacionan di e reforma fiscal.

CAMBIO DI LEY A TARDA

Lastimamente te unda nos por a wordo informa esaki no lo ta e caso, como cu e cambio di ley no a cana na rapidez desea y e parti cu ta beneficia comercio y pueblo no a logra keda cla y lo wordo introduci despues. ATIA ta lamenta esaki profundamente. Durante e diferente sesionan di informacion e preocupacion aki a wordo treci dilanti y hopi siguransa a wordo duna pa esaki, pero sin resultado.

GOBIERNO NO TIN PENSA DI HACI REDUCCION NA SU GASTONAN

E Reforma Fiscal y ABB ta parti importante di e pronostico di entrada di gobierno pa 2016, eliminando esaki ta crea un gap cu gobierno mester bay yena, locual manera custumber lo bay ta na otro sorto entrada. Entrada di gobierno ta semper un of otro forma di impuesto, y lastimamente, di acuerdo cu e rapport di CAFT, gobierno no tin pensa di haci reduccion na su gastonan.

TRANSPARENCIA Y HONESTIDAD DI MANDATARIONAN

ATIA ta boga pa transparencia y honestidad di nos mandatarionan. No por ta asina cu ta crea un ambiente di incertidumbre na momentonan cu nos tin retonan grandi nos dilanti. Ta necesario pa gobierno sea honesto cu Aruba y enfrenta e realidad cu nos tin, un economia cu en berdad ta creciendo, danki na turismo, pero cu ta hopi vulnerabel na factornan externo y un aparato di gobierno cu ta demasiado grandi y cu gastonan cu ta sigui crece.

Pa comercio y comunidad por sostene cualkier cambio den e sistema fiscal esaki mester ta transparente. Gobierno mester balansa su mes tanto na entrada y gasto pa asina por crea un clima di stabilidad pa tanto comerciante local y inversionista.

ATIA ta spera cu den e dianan nos dilanti gobierno por trece e trankilidad y transparencia aki door di sali afor y presenta e plannan concreto cu tur locual tin na caminda pa asina un y tur por haci nan plannan pa 2016 sin cu tin sorpresa