Minister Bermudez no por papia mas riba tema di ABB!!

ORANJESTAD - For di awor, e unico persona cu por papia riba e tema di Algemene Bestedingsbelasting (ABB) lo ta prome minister Mike Eman. Minister Angel Bermudez a confirma na NoticiaCla.com awe merdia, cu e no por papia mas riba e tema. "MP ta comenta riba status di dje" Bermudez a bisa. Esey despues cu Bermudez tabata cla pa duna un declaracion riba e situacion, pa clarifica e declaracion contradictorio di colega prome minister Mike Eman un dia prome. Entre tanto, cosnan a sosode den seno di gabinete Eman durante e ultimo 24 ora cu ta pone cu Bermudez no ta autorisa pa papia riba e tema mas. Segun e mandatario na NoticiaCla.com ta trata di un 'confusion' y 'cambio di pensamento'. 

E PROME INFORMACION 

Ayera cos tabata otro unda cu e mandatario di finanza a comparti e informacion tan spera cu e tasa di impuesto di Algemene Bestedings Belasting (ABB) lo bira 7%. Tabata durante e presentacion di leynan fiscal den Parlamento diaranson merdia, cu e mandatario encarga cu finanzas, Angel Bermudez a informa Parlamento di e cifra aki. “Esey ta e scenario di CBS, cu ta budget neutral” Bermudez a sigura NoticiaCla.com diaranson atardi despues di a informa Parlamento. Mes momento, Bermudez a sigura cu esaki lo ta solamente riba ‘servicio interno’ esta ‘diensten binnenland’. “Productonan ta wordo cobra na frontera (pa medio di invoerrechten), y BBO (y BAZV) lo wordo elimina completamente. Den curso di atardi, sinembargo, prome minister Mike Eman a haci un otro declaracion, diferente cu esun di Bermudez, den sentido cu 'no ta bin ningun ABB'. Pa clarificacion, Bermudez su intencion tabata pa introduci esaki y presente na conseho di minister proximamente, pa asina tuma un desicion final riba e topico aki. Pero awor tin informacion concreto confirma cu 'tin confusion y ta papia di cold feet' den seno di gobierno 

NO POR LOS INFORMACION

Tabata algun siman atras ainda cu e mandatario den combersacion cu NoticiaCla.com a mustra cu tabata dificil pa duna informacion na prensa, prome cu duna parlamento. Problema cu e mandatario no por ‘los informacion ainda’ segun e mes ta splica, tabata cu e tabatin cu duna su conseho di minister prome e informacion y despues parlamento. “Mi ta responde prome na nan” Bermudez a recorda NoticiaCla.com. Y esey no a sosode ainda, esta e palabracion y mas importante ainda, e aprobacion di e plannan pa e reformacion. “Tanten cu esey no sosode, mi no por duna ningun porcentahe riba su mes, pasobra e ta bay bira un bida riba su mes, mientras cu no tin ningun decision riba esaki ainda” Bermudez a bisa. E mandatario a siña cu den e ‘circo politico’ bo no por confirma nada concreto tanten cu e no ta concretisa. “Si ta pami, e por ta e siman aki, pero e por ta otro siman tambe” Bermudez a finalisa bisando.

ABB SU IMPACTO

E reforma fiscal menciona, mester wordo implementa entrante 1 di januari 2016, cu ta nifica un cambio basta grandi di e sistema di impuesto. Entre otro lo elimina impuestonan manera BBO/BAZV, y mucho mas. Y na su lugar ta bin un cantidad di otro cos, mas facil, y miho structura y menos complica pa atende cu ne segun e mandatario. Pero e problema ta cu pa por tin un sistema fiscal mas facil, tin cu sigura cu e simplificacion aki ta cubri un area grandi di departamento, y cu tur esaki ta wordo cubri y cobra di un forma husto. Un ehercicio cu a resulta di no ta nada facil.