ATA ta coregi AHATA riba reduccion turistanan Venezolano

ORANJESTAD- E declaracion recien riba NoticiaCla.com di CEO di AHATA, Jim Hepple, specificamente unda cu ta papia di un reduccion di 50% di turistanan hotelero Venezolano, no a cay den bon tera serca CEO di Aruba Tourism Authority. Como tal, den un comunicado basta extenso, e CEO a aclarea ‘un que otro’ pa mustra cu cosnan no necesariamente ta manera cu AHATA a bisa, y cu nan lo a laga cierto informacion afo. "Mi kier cuminsa na bisa cu nos relacion cu AHATA y Ministerio di Turismo riba e tema aki ta hopi bon, ta habri y transparente", asina Ronella Tjin Asjoe-Croes, Chief Executive Officer di Aruba Tourism Authority a enfatisa. E ta referi na e discusion cu a surgi relaciona cu menos turistanan Venezolano hospedando den hotelnan durante e ultimo 2 pa 3 lunanan.

ANALISIS RIBA CIFRA

E ehecutivo di Aruba Tourism Authority a sigura cu hunto cu AHATA y Ministerio di Turismo a analisa e cifranan y ta consciente di e realidad aki. Sinembargo, ta lamenta cu no ta añadi informacionnan clave cu mester tene na cuenta ora cu papia di shiftnan den e mercado incluyendo e ultimo resultadonan di hotelnan. Mester brinda e informacion completo asina haciendo e contexto den cual mester analisa esaki uno completo tambe!

AEROLIÑANAN A STOP DI BULA PA ARUBA

Den combersacion cu AHATA ora a analisa e cifranan entre otro mester remarca cu aña pasa den luna nan di juli, augustus, september y te cu december sigur, varios aerolinea internacional a stop di bula pa Venezuela, y a nota un crecemento 'explosivo' pa Aruba di pasaheronan uzando nos isla como un "hub" pa Merca, Europa y otro destinacionnan. E turistanan ey ta menos e aña aki.

UZO DI ARUBA COMO HUB

Hotelnan ta traha man den man cu A.T.A., mescos cu AHATA y mester remarca cu tur ta di acuerdo cu e mercado di Venezuela ta uno cu ta "shift" conforme cambionan domestico primeramente. Asina por bisa cu ainda Aruba ta wordo uza como "hub" pero esaki no ta rekeri estadia necesariamente mas di 1 anochi mirando cu orarionan di servicio aereo entre otro tambe a cambia haciendo posibel cu por conecta mesun dia. Pero tambe varios aerolinea a reinstitui vuelo pa Venezuela atrobe, bendiendo esaki nan na dollar solamente. Hotelnan, mescos cu otro nan cu ta depende grandemente di e mercado di Venezuela mester ta prepara pa "shift"nan. Pero esaki ta facil bisa y de facto no ta dje facil, pasobra no por pronostica ki ora e mercado lo cambia y asina afecta negoshi nan cu ta depende di esaki. En todo caso na e momentonan aki, A.T.A. ta trahando estrechamente cu AHATA pa yuda pusha otro mercado pa por yena locual varios hotel a perde di Venezuela. Mester bisa si cu hotel nan ta sigui haya e mercado aki uno atractivo y ta sigui ricibi bon negoshi di Venezuela, entre otro riba e area di "weddings". Pues tur partido ta alinea den sentido di cu e mercado ta keda importante y mester sigui trata di captura e bishitante nan afluente y desea.

COLABORACION ESTRECHO CU AHATA

Na mes momento tambe den colaboracion estrecho cu AHATA ya pa varios luna ta sigui un strategia di diversificacion, den e mercado di Latino America, pero tambe den e mercado di Merca. Asina a anuncia recientemente tambe cu lo enfoca riba e mercado hispano, principalmente e Venezolanonan afluente, na Merca. Esaki nan ta ehempelnan di strategianan cu ya caba a bin ta implementa y cu manera por mira ta sigui amplia, asina enfocando riba mercadonan alternativo, considerando entre otro posibel "shift"nan di Venezuela.

MERCADO DI MERCA TA RESPONDIENDO

Tambe mester nota cu e mercado di Merca ta respondiendo na un manera sublime cu un crecemento di casi 9% te cu september e aña aki. E mercado aki ta uno atractivo cu ta conta cu preferencia di varios hotelnan grandi riba nos isla, ya cu e rendimento ta uno atractivo. Ora cu papia di bahada di cierto mercadonan mester añadi esaki tambe na e contexto completo; manera cualkier negoshi bo ta pone mas esfuerso riba e mercadonan cu ta rindi mas y purba di crea un balansa sano, combinando diferente mercado.

Conforma AHATA su relato, por lo general hotelnan grandi ta sigui conta cu e bishita di e Venezolano afluente na nan hotel.

CANTIDAD DI TURISTA VENEZOLANO NO A BAHA

Di otro banda, cifranan concreto ta confirma cu cantidad di turistanan Venezolano yegando Aruba no a baha, sinembargo tin un segmento nobo. Esey ya A.T.A. a elabora riba dje recientemente y a demostra su inkietudnan den un relato di prensa. Den esey, a consecuencia di e retonan politico y economico na Venezuela, ta yegando mas y mas turistanan cu ta bin pa haya acceso na dollar y ta opta pa keda den apartamento na casnan mes. Esaki ta consecuencia di locual ta pasando na e pais bisiña y mester añadi esaki na e contexto di avancenan for di e mercado di Venezuela; mas ta yega Aruba, pero e "share" cu ta keda na hotel a baha.

DIFICIL PA SEPARA TURISTA FOR DI OTRO

Ronella Tjin Asjoe-Croes a admiti cu ta dificil pa separa e turista cu ta bin pa gasta cu esun cu ta bin pa un otro meta. E realidad ta cu e mayoria di turistanan yegando for di Venezuela ta esunnan cu nos ta desea, cu por ehempel a inverti den un condominio, tin nan mesun cas luhoso, tin time-share na hotel y asina por sigui menciona. No por kita for di e realidad cu Venezolanonan ta entre e turistanan cu ta gasta mas riba nos isla. Pues, e grupo chikito cu awor ta causando molester no por cambia e percepcion y e bentahanan cu e otro grupo ta aporta na dje.

A REUNI CU TUR PARTNER DEN TURISMO

Aruba Tourism Authority a duna di conoce cu e siman aki ainda a reuni cu partnernan den turismo, specificamente riba e retonan di Latino America y entre otro e mercado Venezolano. Na final di dia mester realisa cu e cantidad di Venezolanonan ta sigui aumenta y cu e bolo ta bira mas grandi, y cu no ta tur ta scoge pa keda den hotel. Bisando esey, hotelnan ta keda stabiel, pero relativamente (den "% share" di e total) a bay atras, pa cual A.T.A. lo sigui traha den cooperacion estrecho cu nan y cu AHATA pa mira con por prepara miho pa "shift" nan y mira con por sigura mas estadia di e bishitante Venezolano desea, combinando esaki cu otro mercadonan atractivo.

El a termina bisando cu el a yega di enfatisa e asunto aki na mas di un ocasion den pasado y ta bolbe ripiti'e: "E turistanan Venezolano semper tabata y ainda ta hopi importante pa e desaroyo turistico di nos pais!"