METEO: Den un ora di yobida, total di 28.4 mm awa a cai

ORANJESTAD - Diaranson entre 1:30 pm y 2:30 pm un total di 28.4mm di awacero a cay (registra na aeropuerto) ora cu un area di nubianan entre Aruba y Corsow a desaroya cu actividad di yobida, segun Servicio Meteorologico a informa oficialmente. Y esaki a crusa riba Aruba. E parti zuid y oost di Aruba a haña awasero relativamente pisa compara cu e parti noord y west. Na airport Reina Beatrix un total di 28.4 mm awa a cai y banda di e hotel area un cantidad di 6.1 mm. Bomberonan mester a asisti na algun cas na Tanki Leendert y banda di cas di partido di AVP. Awa a yena di mas, y otronan tabata cera nan cura, cu ta pone cu awa no tabata pasa y busca otro caminda. Mester a kibra algun cura pa laga e awa pasa, segun NoticiaCla.com su informacion for di bomberonan. 

PRONOSTICO

Pa e siguiente 24 oranan e shelo lo ta parcialmente nubla debi na un disturbio atmosferico den nivelnan mas halto. Esaki tambe por induci algun yobidanan isola. E biento ta mengua te diabierna y ta aumenta despues. Shelo lo keda parcialmente nubla cu chens pa algun yobidanan isola. Temperatura maximo lo ta 32 grado celsius y temperatura minimo 26 grado celsius.