Expertonan petrolero ta confirma cu LPG ta bon alternativa pa Aruba

ORANJESTAD - Expertonan petrolero confirma cu LPG ta un bon alternativa pa Aruba. Arugas N.V. recientemente a organisa un seminario den cuadro di nan 75 aniversario. Pa esaki a pone hunto un panel di experto riba tereno di gas y petroleo unda cada un por a duna di conoce kico ta nan punto di bista y nan experticio. “Ya caba, Arugas tin 75 aña como compania lider na Aruba den loke ta distribucion di gas. Nan no ta para keto y nan tin hopi mas pa haci pa nos isla”, asina Roberto Geerman, Managing Director di Arugas N.V. a laga sa durante e apertura di e seminario.

SEMINARIO

Personalidad nan representando diferente compania di Aruba tabata presente pa scucha tur locual tabata tin pa trece dilanti.

Tin diferente posibilidad. Mundo petrolero ta treciendo perspectivanan interesante unda cu por ehempel, awor produccion di gas propano ta subiendo mientras cu e demanda ta keda abou, esaki ta haci cu e prijs a baha y Arugas por ofrece gas na WEB N.V. na un prijs competitivo cu lo tin gran beneficio pa henter e comunidad di Aruba.

EXPERTO INVITA GLAB

Professor Edward Glab, tabata un di e expertonan invita. E ta Director di Global Energy Forum International and Public Affairs (SIPA) na Florida International University. Profesor Glab a haci un analisis di e posibilidadnan pa uso di LPG (propane gas) den e region di Caribe. El a laga sa cu el a bishita Aruba den añanan 90 y e ta asombra cu e desaroyo cu nos isla a experiencia den e ultimo añanan. Tambe el a agrega cu e informacion cu e ta comparti ta bin for di autoridadnan y fuentenan confiabel. E tin mas di 35 aña den e negoshi di energia,15 aña como consultor den diferente compania y 25 aña trahando den e tereno di refinacion di petroleo rond mundo. El a indica cu e demanda pa loke ta gas y petroleo a cambia. E prijs di petroleo no lo bay bek na $100 pa bari prome cu 2020/2025 ora cu e "shale production" na Merca ta bay cuminza bay den disminucion.

DEMANDA DI CRUDO

E demanda di crudo na China, India, e parti zuid-oost di Asia y Africa lo dirigi e prijsnan global a largo plazo. E prijsnan no lo subi asina facil manera antes pa motivo cu produccion di shale ta e stabilizado nobo di mercado pa loke ta e siguiente 10 añanan, asina Glab a enfatiza. Banda di esaki, el a indica cu e grandura di e mercado global di LPG a wordo calcula den $219.43 biyon na 2013. Representando, e consumo comercial/residencial den un total di $101.23 biyon di e mercado total na 2013.

EX EHECUTIVO DI VALERO

Dr. Eduardo del Valle ta un ex ehecutivo di Valero. El a elabora riba e industria di petroleo na nivel mundial y el a enfatisa cu Aruba ta ubica geograficamente na un lugar privilegia y por tin acceso na crudo di un manera competitivo. E ta mira cu e exito di un refineria pafor di Merca, awendia ta depende di eficiencia y uzo di gas como e fuel principal pa keinta e petroleo enves di Heavy fuel Oil, HFO. E publico cu a asisti na e seminario a sali sumamente satisfecho y a pidi pa repasa e presentacion di e diferente oradonan, esaki ta posibel bishitando e website www.arugaseminar.com.