Capelo: Rector di Colegio ta bolbe pega otro barco!

ORANJESTAD – "E homber ta pega otro barco!". Asina docente di Colegio Arubano Alfredo Capelo a bisa NoticiaCla.com diaranson mainta. Un biaha tin problema na Colegio Arubano entre e rector di e scol Hans Timmermans y e docente. E biaha aki cos a bay dje leu cu e rector a prohibi entrada di Capelo riba tereno di Colegio Arubano. Esaki pasobra Capelo lo a ‘menasa’ e rector cu morto, den un forma indirecto. Esey tabata suficiente pa e rector tuma e paso di ‘ontzeg’ entrada na Capelo. E docente en cuestion (Capelo) fuera di a confirma na NoticiaCla.com cu e no ta permiti pa subi tereno di Colegio Arubano, tabata hopi corto den su reaccion. “E homber ta pega otro barco!” Mas e no kier bisa awor, pasobra e caso ta den man di abogado.

MENASA CONTRA RECTOR

For di fuentenan serca di e rector na Colegio, NoticiaCla.com a haya confirmacion cu Capelo a menaza Timmermans cu morto. “Pero no direct . El a bisa esey na un colega, y e colega ey a bai bisa Timmermans” e fuente a confirma na NoticiaCla.com. Rumornan cu Capelo lo a wordo retira tambe, a keda desmenti si. “E no a wordu kita. E no mag subi tereno di Colegio y nan a kita su taakuren pa organisa project reis”. Oficialmente Capelo a tuma su retiro entrante 1 di januari proximo, pero e ta tuma su compensatie dagen awor aki . “E no ta duna les mas. Mihor bisa e tawata cu vakantie. Pero awor e no mag subi tereno di Colegio” e fuentenan a sigui bisa.

CONTACTO CU RECTOR Y CAPELLO

For di diamars anochi NoticiaCla.com a busca contacto cu e rector Hans Timmermans (cu ta den exterior), pero e no a contesta nos yamada y email ainda. E docente en cuestion Alfredo Capelo tambe ta den exterior, pero e si a reacciona, aunke ta breve. Pa loke ta e cargonan, fuentenan di NoticiaCla.com a confirma cu Timmermans a haci e participacion di e ontzegging na Capelo den un reunion reciente na e staff, pues tur ta na altura di e informacion aki mientrastanto.

PAZ A DURA CORTO

Rectorado di Colegio Arubano y docente Alfredo Capelo a haya otro den un combersacion na comienso di september riba e problemanan cu tabatin entre nan dos. Pero aparentemente awor ta resulta cu e paz aki tabata pa corto. Den un reaccion na NoticiaCla.com na september, despues cu Capelo a entrega su retiro y no kier a bolbe mas pa motibo di diferencia di opinion cu e rector. Timmermans a confirma cu Capelo a opta despues toch pa no bay mesora, sino mas bien despues di un termino. Tambe e lo keda yuda cu algun actividad escolar manera cu semper ela sa di haci.

PENSAMENTO DI CAPELLO

Segun Timmermans, e tempo ey Capelo a vocifera cu e ta hay'e duro pa bandona e dos klasnan cu e tabata duna les, asina sin mas pa no laga nan na caya. “Esey ta di elogia, cu e ta pensa riba e alumnonan” Timmermans a bisa. Esey no ta kita afo cu ya nan a haya un reemplasante pa Capelo su klas. Den su combersacion cu e rector, Capelo a splica e rector cu e dunamento di les ta afectando su salud y cu e ta cay pisa p'e. Y e rector a bisa cu kico cu pasa, e salud ta prome cu tur cos. “Abo por cay muri, pero scol ta continua. Scol no ta warda riba un hende ora cu e ta malo of muri. Salud ta riba tur cos”.

COMPROMISO

Algun rato prome e luna ey, NoticiaCla.com a raporta cu partidonan a yega na otro, unda cu a palabra pues cu Capelo ta sigui duna les te fin di e prome periodo, cu a finalisa 23 di september ultimo. E lo a keda organisa e biahe pa Colombia, y e ta haya un despedida di parti di e alumnonan fin di september, y coleganan mes ta dispidi di dje durante e gala di pasco fin di aña. Riba e pregunta cu si tur cos a normalisa na scol atrobe, Timmermans a bisa cu si. “Mi ta kere cu bo por bisa esey”.

DISPENSA DI ALUMNONAN

Algun otro asuntonan cu a keda colga y cu a conduci na entre otro e disturbionan (manera e rector mes a yama e asunto), ta cierto puntonan cu no a bin na ordo. Mes momento Timmermans a mustra cu e la ricibi cartanan di alumno cu tabata pidi nan despensa pa loke a sosode diamars ultimo. “Eigenlijk bo tabatin rason” hopi a skibi, argumentando cu antes (riba e tema di musica den pauze) tabata toca musica solamente riba dianan special manera carnaval y Halloween. Sigur no tur dia”. E rector ta conciente cu porta e decision di para musica abrupto, a cay malo, pero e ta sigui pensa cu e musica y e volumen di ultimo dia, tabata haci dificil pa alumno y docentenan por a papia cu otro. “Como tal, ainda mi ta para tras di e punto ey. Pero mi ta dispuesto pa papia cu leerlingenraad pa wak si por toca musica cu volumen abou, final di les diabierna. Pero no tur dia, tur pauze manera cu e la sosode prome”. E rector ta sinti cu e rosea cayente riba dje a kita atrobe. Algo cu el a haya teribel diamars. Awor cos a normalisa y ora cu e cana rond di scol, e ta cuminda alumnonan y ta papia cu nan di un forma mas normal.

DISTURBIO

Tabata comienso di september cu e scol a conoce algun disturbio ora cu un cantidad di 600 alumno a opta pa protesta den forma di bisti na blauw scur y sinta abou riba pleinchi durante e prome dos lesuur. E motibo lo tabata rumornan cu a circula riba facebook riba desicionan tuma contra Capelo y su declaracionan contra e maneho di rectorado. Desicionnan di rectorado lo a cunsumi Capelo di tal forma cu e la opta den forma abrupto un dia prome pa tuma su retiro. Esey tabata suficiente pa crea un ola di reaccion tanto na scol y pafo di scol, di ex alumnonan cu a haya les den pasado di Capelo. Na final ora cu e rectorado a splica tur cos kico ta kico, tur trankilidad a bin bek y cos tabata normal atrobe.