Mas detencion, y tres cu a huy, detecta via interpol den exterior

ORANJESTAD – Un otro detencion a cay diaranson marduga relaciona cu e caso di atraco di Excelsior Casino. E informacion no ta hopi, pero vocero di Ministerio Publico Ann Angela a confirma pa NoticiaCla.com cu e detencion a sosode na Boegoeroei, y ta relaciona cu e caso. Mes momento a confirma cu interpol a señala 3 otro persona sospechoso den exterior, aunke detayenan no ta conoci ainda. Pues ainda tin mas persona cu mester keda deteni. Awor tin un total di 7 persona deteni den e caso, 4 latino (3 Venezolano y 1 Colombiano) y 3 local. Tres persona ta fugitivo den exterior. 

DETENCION MARDUGA

Pa loke ta e detencion di diaranson marduga, ta trata di un homber local inicial F.A.C. (26) cu a wordo deteni na Boegoeroei. No tin informacion kico su envolvimento tabata, sino cu solamente el a keda deteni tambe y ta bira asina e di 7 detenido, e di 3 local cu ta cera awor pa e mesun caso di atraco.

TRES A HUY PERO TA DETECTA VIA INTERPOL

Relaciona cu e otro informacion, Angela por a confirma solamente cu ‘tin mas sospechoso, pero nan no ta na Aruba mas. Nan a wordo señala via interpol. Unda nan a wordo señala no ta conoci y ta informacion cu lo por yega mas den ora di merdia. E hecho ta cu e tres personanan aki a wordo señala caba y no ta descarta cu dentro di poco nan tambe lo por wordo deteni y treci bek pa Aruba. Nan relacion cu e caso no ta conoci pa NoticiaCla.com y no a haya informacion mas riba nan di parti di Ministerio Publico.

E OTRO DETENCIONAN 

E di 6 sospechoso den caso di atraco di Excelsior Casino a keda deteni dialuna atardi. Tabata den careda di 2'or na altura di Miramar Rumshop cu autoridad policial a detene e homber local di inicial G relaciona cu e caso di e atraco. Vocero di ministerio publico Ann Angela a confirma e detencion y ta confirma tambe cu esaki ta bira e di dos local cu ta cay cera pa e caso aki.  E di cinco persona a keda deteni den e caso di atraco di Excelsior Casino dia 11 di november ultimo. Ta trata di e homber local di inicial A.E.A, segun vocero di ministerio publico Ann Angela a confirma awe mainta pa NoticiaCla.com. Segun Angela, e persona aki a keda deteni diaranson mainta na su cas. Informacion adicional cu NoticiaCla.com tin, ta cu esaki a sosode na Dakota. E persona su 'rol' den e caso aki, tabata pa suministra e pandiya cu arma. "E ta wordo sospecha di ta esun cu a percura pa arma" e vocero a sigui bisa NoticiaCla.com. Cu e detencion aki, e cantidad di persona deteni pa e caso aki, ta bira pues 5. Tres ta homber Venezolano, uno ta un muher Colombiano, y awor un homber local. E prome 4 nan ta den detencion ainda, aunke mucho mas informacion (pa motibo di seguridad) no por a wordo duna. No ta descarta cu mas persona por keda deteni ainda. E di 4 persona a keda deteni dia 3 di november anochi relaciona cu e atraco di Excelsior Casino. “Mi por bisa bo cu polis a detene un di cuater sospechoso den e investigacion na e atraco riba Casino Excelsior na Holiday Inn”, vocero di OM a bisa e dia despues. Segun Angela, tabata trata di e muher J.U.L. “ Pa loke ta e detencion laat  diadomingo anochi di e tres sospechosonan pricincipal di e atraco di dia 26 di october, OM a identifica nan e siguiente dia cu ta e tres personanan sospecha di a atraca e casino Excelsior Casino. Asina vocero di ministerio publico Ann Angela a sigura NoticiaCla.com. Mientras cu for di ora e noticia a keda conoci cu a ‘detene’ e tres atracadornan, e pregunta tabata si por a confirma esaki. Segun Angela por confirma cu enberdad ta e tres personanan aki.

SIN PLACA OF ARMA

Ora cu a gara e tres personanan aki e diadomingo anochi, nan no tabatin arma of pero si placa den nan poder, segun Angela a bisa. Pa motibonan obvio di seguridad, Angela no por a duna detaye di nan proximo paso, esta ki ora y dia e tres personanan aki tin cu bin dilanti huez comisario. “Nos no kier bisa”, Angela a contesta riba e pregunta ey. Pa aworaki, esey ta e informacion cu por a keda suministra. Angela a bisa si, cu mientras cu e investigacionnan ta siguiendo, no ta exclui mas detencion cu por cay den e proximo ora, dianan nos dilanti. Esaki ta depende di con e interogacionnan ta bay y kico mas e investigacion ta trece dilanti.