E experiencia di e Venezolano cu ta ‘raspa’ na Aruba

ORANJESTAD – E Venezolanonan cu ta bin Aruba pa entre otro raspa, ta pasa door di hopi cos durante nan bishita riba nos isla. Y despues di varios luna di tende e critica di parti di e Arubiano y nan mal experiencia cu e grupo di Venezolano aki, NoticiaCla.com tin un raportahe di e otro banda. E banda di e Venezolano for di ora cu nan bin Aruba, kico nan ta haci, y tambe kico nan ta pasa aden durante nan estadia riba nos isla. Un raportahe di e periodista Tibisay Romero di e corant El Nacional, cu a documenta esaki en cooperacion cu NoticiaCla.com y a laga nos reproduci esaki. Mester nota tambe cu NoticiaCla.com a wordo acerca, pa un contribucion. Esaki den un bista obhetivo di e banda periodistico di con ta wak e situacion aki. E articulo di El Nacional, ta un compilacion di pida di e puntonan mas resaltante di e bishita di un Venezolano na Aruba, cu ta bin cu e unico meta, pa drecha su situacion financiero na su pais. E ta un articulo completo, cu entrevista cu autoridadnan di Aruba tambe, manera CEO di ATA, declaracionnan di gobernantenan di Aruba segun relata den medionan na Aruba. Un splicacion pues amplio y documenta, cu ta duna un bista obhetivo di e situacion. NoticiaCla.com a compila ‘highlights’ mas bien di e experiencia di e Venezolano, cierto puntonan cu ta resalta di e comportacion y detayenan cu semper a cuestiona y puntra nos mes, ‘con cierto cosnan aki ta sosode y pasa’.

ORA CU E VENEZOLANO YEGA

Mayoria Venezolano cu yega Aruba, ora cu porfin nan yega na turno na imigracion, ta encontra e prome ‘obstaculo’ fastioso pa nan. Nan ta pasa casi mei ora cu e persona di imigracion, cu ta scrutina nan completamente, pa sigura cu e Venezolano por drenta nos isla legalmente. Henter e proceso ey, pa Venezolano, ta dura casi mei ora, compara cu e 4 minuut cu normalmente un turista cu yega Aruba ta pasa aden. Imigracion ta pidi un sin fin di documento, ta conta tur e placa cash, un pa un y asina tin mas. (corda cu esaki ta e version di banda di e Venezolano)

ODISEA NA ARUBA PA SOBREVIVI

Unabes cu nan (e Venezolanonan) drenta Aruba, nan odisea ta cuminsa. Nan no ta interesa den saca potret di e isla, saca mapa pa un excursion, of cumpra souvenir. Nan tin un solo meta. Haya mas tanto dollars pa hiba nan pais bek. Nan ta purba saca lo maximo cu ta 700 dollar cu nan por tin pa 7 dia di estadia na Aruba, y multiplica esaki cu 800, segun e tasa di mercado preto na Venezuela. Asina nan ta purba aumenta nan presupuesto mensual.

NAN ESTADIA NA ARUBA DEN UN POSADA

Den e raportahe, un of dos Venezolano ta conta nan cuenta, den detayes. Aki ta resalta entre otro cu nan ta wordo yuda pa algun cu ya caba a bin Aruba varios biaha caba. Nan ta wordo busca pa un pareha Colombiano cu ta hiba nan na un posada (cas comberti den un hotel). Nan ta bin cu cuminda den bleki, pa no tin cu cumpra mucho cuminda. E pareha anfitrion ta hiba nan pa e centro (Oranjestad) tur mainta tempran y busca nan atardi laat. “Asina nan ta evita di uza e coriente y awa di e posada”. Gastonan ta minimo. Pa esnan cu no ta cana di aeropuerto y lastra maleta manera cu a bira e forma mas conoci, tin cu ta paga 10 dollar pa nan wordo busca. Acerca, ta bin 25 dollar cu nan ta paga pa cabez pa anochi di hospedahe pa persona.

GASTA MENOS POSIBEL

Nan sa bay casino pa purba saca mas hopi dollar tambe. Tin casino cu ta permiti nan pa ‘raspa’ basta placa. Nan ta cana den caya henter dia, haci ‘window shopping’ pero no ta cumpra nada. “Nos ta haci'e pa distrae, pero nos no ta gasta nos placa”. Anochi nan ta bolbe cas, come, baña y drumi. Esey tabata e rutina.

COLOMBIANO, ARUBIANO Y CHINES TA YUDA

E negoshi di posada, no ta solamente Colombiano ta ofrece nan esey, sino tambe persona ‘di origen asiatico’, manera nan ta raporta. Osea Chinesnan cu tambe kier gana placa extra. Aki tambe ora cu nan cobra e Venezolano e placa di hospedahe cu credit card, nan ta recarga nan extra, pa asina debolbe e ‘extra’ na e Venezolano, estilo ‘raspacupo’, den forma di placa den cash. E wega, ta cu ta cobra riba e recibo, placa di alohamiento, y tambe ‘actividadnan recreativo’, cu a suma 300 pa 400 dollar. Gran parti di esaki ta pa nan mes den forma cash. Cambernan tambe por bay pa 15 dollar pa anochi.

E VENEZOLANO CU TA CANA LASTRA MALETA

Un Venezolano ta splica cu ora cu nan a yega, ningun hende a bin busca nan. Nan ta esnan cu nos conoce cu ta cana lastra maleta for di aeropuerto, te ora cu nan yega nan destinacion. “Nos tabatin e direccion anota, y nos mester a cana segun e direccion cu nan a duna nos”. Nan ta cumpra awa y ijscream, pasobra tabata haci hopi calor. Despues un grupo di Arubiano (amigo di e chines unda cu nan tabata hospeda) tabata busca e Venezolanonan. E articulo ta relata tambe cu varios caminda a para bira manera un peregrinacion di turistanan Venezolano en busca di dollar. “E escena ta cada bes mas frecuente y rechasa pa esnan cu ta biba na Aruba” e articulo ta sigui bisa.

ALARMA PA LOKE TA COMERCIO CU VENEZOLANO

Interesante tambe ta e mencion di ora cu un luna pasa alarma a cuminsa zona pa varios negoshi na Aruba. E noticia cu varios negoshi a wordo atrapa pa banconan, pa nan uso ilegal di machine di swipe carchi. E negoshinan despues a cuminsa pone papel riba e tienda bisando cu nan no ta raspa cupo, tampoco no ta duna placa cash bek. Y esun mas recien “Nos no ta acepta credit card. Ta referi te hasta na esun ultimo unda cu no ta permiti Venezolano na grupo. Ta splica e proceso con Venezolanonan ta acerca Arubianonan cu e fin pa logra placa. E articulo a keda publica den fin di siman den e corant El Nacional, na Venezuela, y a crea hopi reaccion. Mayoria di nan di disgusto, y odio pa e loke cu Venezolanonan tin cu pasa aden. Mayoria di nan, di e grupo cu si ta bin Aruba den hotel, y pasa y gasta. Nan no ta gusta e forma con e situacion actual ta. Hecho ta, cu e reaccion riba e situacion di e Venezolanonan aki, ta hayando atencion na Venezuela, y no tur ta bon. (lesa e articulo original aki). Foto cortesia Tibisay Romero/El Nacional