Minister y e presidente di Smac a reacciona riba Alvin Wever

ORANJESTAD – Tanto minister Otmar Oduber como presidente di SMAC Randy Thiel, a desmenti acusacionnan y comentarionan di ex miembro di Raad van Toezicht di e organisacion carnavalesco un dia anterior. Ambos a duna nan reaccion separa, pero cu e mesun resultado. Esta cu segun nan, Wever su comentario y acusacion no tin base y no ta basa riba realidad. De hecho, ambos a duna nan version di con cos a bay y kico tur a sosode.

MINISTER ODUBER

Minister Oduber, papiando cu NoticiaCla.com for di exterior, a rechasa e acusacion di Wever, di cu e lo ta eherce influencia politico den e organisacion carnavalesco. “Absolutamente!” Oduber a sigura NoticiaCla.com. Y cu Oduber lo a pone presion riba ATIA pa sali for di SMAC (lesa, saca Wever afor), tambe e mandatario a desmenti. “Esey no ta berdad” Oduber a bisa. Su version (di Oduber) ta cu cosnan simplemente no tabata bay corecto y cu e instancianan respectivo mes a tuma nan accion. E mandatario a lamenta cu e cos mester a yega asina leu unda cu segun Oduber, door cu e (Wever) no ta contento cu e organisacion cu e tabata representa (ATIA), no a back e up. Segun Oduber, Wever no kier a participa den e plan pa cambia statutonan pa agilisa cosnan den SMAC, cu a conduci cu ATIA mester a retira ya cu Wever no kier a retira pa duna espacio pa e cambionan tuma lugar. Cu retiro di ATIA, automaticamente Wever lo mester a sali for di SMAC, cual segun Oduber, e lo no a gusta.

REACCION DI RANDY THIEL

Pa loke ta presidente di SMAC Randy Thiel, el a bay den mucho mas detayes di loke Wever a haci y laga di haci. Segun Thiel, cosnan cu no a bay na agrado di Wever, lo a conduci cu e lo a actua asina. Entre e ehempelnan duna, ta rechaso pa huur un oficina di dje, y tambe no a uza su negoshi pa traha plakkaat y trofeo. Asina tin un cantidad di cos mas cu Thiel a menciona durante e conferencia di prensa awe merdia.