Homber arma a atraca Negro Diamante Lottery

KUDAWECHA - Un homber arma a atraca e lugar di lotto Negro Diamante Lottery awe nochi, y bay cu mas of menos 1000 florin. Segun vocero di polis Liliana Rasmijn a confirma na NoticiaCla.com, e atraco a tuma lugar algo prome cu 9'or ora cu e señora tabata cerando e lugar. E homber, segun version oficial policial, a drenta e lugar cu arma, pidi e señora pa e placa bay cu e benta di dia, balora pues na mas of menos e suma menciona. E homber a sali na careda drenta mondi, y ta fugitivo. Polis ta trahando riba e caso aki. Rasmijn a confirma tambe cu semper tin extra control riba e anochinan cu premio ta grandi. Awe e premio a alcansa 1 miyon florin di Mini Mega Plus. Ta conoci pues cu e ora polisnan ta mas vigilante mirando cu tin hopi placa den circulacion, ya cu ora cu premio ta halto asina, tin mas benta y mas interes pues pa cumpra lotto. Mester menciona tambe cu esaki ta e di dos biaha cu e lugar aki  (y e mesun señora) ta wordo atraca, ya cu aña pasa esaki a sosode eynan caba.