Aeropuerto cla pa maneha cantidad record di pasahero

ORANJESTAD - Cu 139 mil stoel adicional den e lunanan nos dilanti, gerencia di aeropuerto di Aruba a sigura tur hende awe cu nan ta cla pa maneha e cantidad record di pasahero. “Nos di Aeropuerto di Aruba ta satisfecho cu e pronostico pa loke ta capacidad pa Aruba den e periodo venidero di Winter”, asina Jo-Anne Arends, encarga cu e seccion di “Airline Marketing” na Aruba Airport Authority a duna di conoce. E ehecutivo di aeropuerto ta bisa esaki pasobra ta premira un crecemento record atrobe, den cual lo aumenta e cantidad di stulnan disponibel pa Aruba den forma historico!

HIGH SEASON

Aerolinea nan ta categorisa dos periodo di "scheduling" den un aña, cu ta e periodo di zomer y winter. Ta considera e lunanan november te cu fin di maart como e periodo di winter. Esaki ta cay net tambe como e periodo cu nos na Aruba ta considera nos “High Season” den turismo.

CRECEMENTO DI STUL DEN PORCENTAHE

Pa e periodo specifico aki, Aeropuerto di Aruba ta premira un crecemento total di 16% den capacidad di stoel disponibel pa nos isla, cu ta ekivalente na un total di 139 mil stoel adicional! Pa nos mercado principal di Merca, ta premira un crecemento di 4% pa Aruba.

COMBINACION DI CAPACIDAD ADICIONAL

E crecemento aki ta un combinacion di capacidad adicional di nos partnernan local, Aruba Airlines y InselAir Aruba, pero specialmente di otro partnernan Mericano manera United y American Airlines cu vuelonan adicional of cu a aloca avionnan mas grandi di for di destinacionnan manera Newark, Houston y Charlotte. Tambe Southwest Airlines cu vuelonan di Houston cu ta conecta e parti West di Merca cu Aruba, como parti di nos plan strategico pa atrae turistanan afluente for di mercadonan diferente.

MERCADO LATINO AMERICANO

Pa loke ta encera e di dos region principal, esta Latino America, excluyendo e crecemento den capacidad di Venezuela, tambe por mira cambionan den "connecting time" for di e dos hubnan principal cu ta Bogota y Panama. E cambionan aki ta pa aumenta trafico aereo for di e mercadonan principal manera Colombia mes, Chile, Argentina y Brazil.

MERCADO EUROPEO

E mercado di Europa lo mantene e cantidad di vuelonan di KLM y Arkefly/Tui Group. Si lo tin vuelonan charter adicional for di Inglatera, specificamente for di Manchester y London Gatwick.

AEROLIÑANAN HOPI SATISFECHO

Arends ta sigura cu aerolineanan bishita recientemente na Merca, ta ‘hopi satisfecho cu e resultado riba e rutanan pa Aruba’. “Mi kier a agrega cu dos siman pasa hunto cu un delegacion consistiendo di ATA, AHATA, Ministerio di Turismo y Aruba Airport Authority, nos a tene reunionnan masha fructifero cu tur nos aerolinea nan partner na Merca. “ Y ta premira un aña 2016 cu miho resultado cu 2015”, asina Jo-Anne Arends a enfatisa.

PREPARANDO PA UN TEMPORADA DRUK

Cu e realidad aki riba mesa, Aruba Airport Authority awor a cuminsa prepara internamente pa e temporada druk cu ta drentando den december y cu lo sigui te cu fin di maart, den cual lo tin mas avion, mas vuelo y mas capacidad pa nos isla. Esey riba su mes ta trece un presion den operacion na nos aeropuerto, pa maneha tanto avion como pasahero. Sinembargo, Aruba Airport Authority ta sigura cu mes tanto esfuerso cu ta hinca den atrae aerolinea nobo y pa aumenta capacidad di asiento disponibel, mes cantidad di esfuerso tambe ta hinca na inversion den ekipo humano y forma moderno pa promove mas eficiencia den maneho di fluho di pasahero.