Musica mes ta encarga cu organizacion Caiso y Soca Monarch 2016

ORANJESTAD - Despues di varios reunion cu a tuma lugar entre Minister Otmar Oduber y SMAC y Musica durante algun luna caba, SMAC a presenta e siguiente proposicion na Musica. Pa e organisacion aki tuma e ehecusion completo di Caiso y Soca Monarch pa aña 2016.Minister Oduber a indica cu mirando con e reunion di dialuna a bay, e ta practicamente 100% sigur cu Musica lo acepta e proposicion di SMAC. Musica lo mester a reuni den su seno riba e proposicion aki pa cual SMAC no ta exigi ningun compensacion y Minister no por saca otro conclusion cu nan lo bay di acuerdo cu ne y bira e organisador di e festival.

Na momento cu Musica duna su aprobacion, SMAC lo traspasa e derecho na Musica pa organisa Caiso y Soca Monarch pa aña 2016. SMAC lo keda como vergunninghouder, pero lo duna full e autorisacion na Musica pa su organisacion. Esaki contrarario na loke a tuma lugar na 2015 cu e evento a wordo organisa dor di tur dos.E mandatario di Cultura a indica tambe cu a yega na un acuerdo cu tur e fondonan restante lo wordo traspasa di SMAC pa Musica. Esakinan ta encera e sponsorshipnan di Setar, AAA y di Gobierno como tambe e esfuerzonan cu ministerio a haci pa por paga ainda e premionan pendiente di Carnaval 60. E suma total cu a wordo traspasa ta Afl.121,497,=. Por cierto, e ultimota trata aki di un compromiso y acuerdo cu Hildward Croes q.e.p.d. como Presidente di Musica a yega na dje cu Minister di Cultura.

Pa loke ta trata e comentarionan cu Gobierno y of ATA lo a duna sumanan grandi na SMAC, Minister Oduber a bisa enfaticamente cu esaki no ta e caso, e suma cu a wordo duna ta exactamente e mesun cu a duna na 2014 y esaki ta preto riba blanco y na bista di tur hende den e cuentanan anual di SMAC, cual pa prome biaha for di existencia di Carnaval a presenta na publico nan jaarrekening.

Banda di esaki a yega na e acuerdo cu Musica lo sigui forma parti di SMAC cu un total di 4 miembro cu lo wordo anuncia diabierna, logrando asina cu hunta di SMAC lo ta completo.

Minister Otmar Oduber ta sumamente satisfecho cu por a yega na un acuerdo entre e dos organisacionnan aki cu ta asina importante pa nos Carnaval. El a pidi nan tur dos pa traha conhuntamente na bienestar di nos Carnaval y a pidi tur hende pa laganan traha trankilamente sin instigacionnan pa cada un di nos por celebra un temporada di Carnaval 62, cu ta asina cortico, den su pleno gloria y esplendor.