ATIA ta confirma retiro for di SMAC pero ta keda sostene

ORANJESTAD – Aruba Trade and Industry Association (ATIA) ta confirma nan retiro di SMAC, pero ta bisa mes momento cu nan ta sigui sostene e fundacion carnavalesco. Un dia despues cu NoticiaCla.com a raporta e keho di e miembro di ATIA den Raad van Toezicht (RvT) di SMAC, esta Alvin Wever, ATIA mes a sali dilanti cu nan reaccion.

RETIRA DI SMAC

Segun e comunicado di ATIA, ‘despues di basta deliberacion y en bista cu e actual structura no ta permiti e directiva funciona segun e rapport traha pa funda SMAC, ATIA a opta pa sali for di e constelacion actual di SMAC y asina duna e espacio necesario pa por restructura e fundacion” e comunicado ta cuminsa bisa.

SIGUI CU SOSTEN

ATIA ta sigura cu nan ta sostene e idea tras di SMAC y como tal ta recomenda pa hunto cu Gobierno, pa haci cambionan den e structura actual pa por beneficia carnaval en general. Carnaval ta parti importante di nos economia y como tal e fundacion cu ta atende cu esaki mester por funciona den forma independiente, cu e eficiencia necesario y cu e meta pa no solamente engrandece, pero tambe pa desaroya nos carnaval den forma duradero.

KINDERZIEKTES DI SMAC

Loke cu a sosode, ATIA ta considera meramente kinderziektes y ta mustra cu ‘tur fundacion tin "kinderziektes" na comienso y ta importante pa haci cambionan ora ta necesario, pa evita ripiticion di erornan di pasado”. Cu retiro di e directiva di ATIA ta spera di habri caminda pa mas cambio y pa yega na miembronan nobo den e directiva cu lo sa di hiba nos carnaval na horizonte nan nobo.

7O AÑA DI ATIA

Den un intento pa defende e critica contra dje di Wever, riba e logro di 7o aniversario, ATIA a sigura den nan comunicado cu nan ‘ta den pleno celebracion di nan 70 aniversario, tin un lista largo di prioridadnan pa atende cu ne na e momento aki. Den e situacion economico dificil cu mundo ta bibando aden awendia, ta rekeri atencion tur caminda, cu un wowo skerpi riba eficiencia, control di gasto y genera mas entrada posibel. ATIA como tal ta haciendo hopi esfuerso pa mira unda por sostene su miembronan dor di ta den contacto directo cu e stakeholdernan cu por influencia crecemento economico riba nos isla” e gremio a finalisa bisando.