SMAC a priminti reaccion riba Alvin Wever y MUSICA awe tardi

ORANJESTAD – Un dia despues cu NoticiaCla.com a presenta e desacuerdo di ex miembro di Raad van Toezicht di SMAC, Alvin Wever y cu e mes a bin dilanti riba su pagina di Facebook, SMAC a priminti cu den curso di diamars atardi, nan lo duna nan banda di medaya. Nan a yama un conferencia di prensa pa awe merdia na nan cede, durante cual nan lo ‘toca ultimo desaroyo cu MUSICA, y declaracion di sr Alvin Wever’. Aki pues mester bin claridad riba e situacion cu a surgi y por tende e banda di medaya di e organisacion carnavalesco, cu apenas algun dia despues di inicio di temporada di carnaval, ta hay'e den un situacion incomodo controversial.

ATIA

Di parti di ATIA, nan tambe a reacciona dialuna atardi riba e tema aki, specificamente di parti di nan representante, esta Alvin Wever. Entre otro nan a mustra den un comunicado cu “Despues di basta deliberacion y en bista cu e actual structura no ta permiti e directiva funciona segun e rapport traha pa funda SMAC, ATIA a opta pa sali for di e constelacion actual di SMAC y asina duna e espacio necesario pa por restructura e fundacion.” Mesun momento den un intento pa kita tur duda cu nan retiro lo nifica un ‘kiebro’ cu SMAC, nan ta mustra cu “ATIA ta sostene e idea tras di SMAC y como tal ta recomenda pa hunto cu Gobierno, pa haci cambionan den e structura actual pa por beneficia carnaval en general. Carnaval ta parti importante di nos economia y como tal e fundacion cu ta atende cu esaki mester por funciona den forma independiente, cu e eficiencia necesario y cu e meta pa no solamente engrandece, pero tambe pa desaroya nos carnaval den forma duradero.”, Sinembargo nan no a haci mencion di nan representante Alvin Wever den e comunicado.

MINISTER OTMAR ODUBER

Minister encarga cu cultura y pues carnaval, Otmar Oduber a priminti cu den curso di dia (e ta den exterior), lo duna reaccion riba ambos tema. Specificamente e reclamo riba su persona di Alvin Wever, y tambe un clarificacion riba e situacion di MUSICA y su intermediacion. Mientras cu a manda un comunicado, esey tabata uno unda cu no a saca afo exactamente kico e resolucion di e problema ta, y mas bien tabatin un tono hopi diplomatico, pa wanta e situacion mas trankil posibel.