CAFT y gobierno ta contradeci otro riba tema di personal

ORANJESTAD – Segun cifranan di e plan di gobierno, conoci como e marco pluri-anual (meerjarige kader) 2017-2020, gobierno di Aruba lo no spaar nada riba e tereno di personal den 2016. Asina College Aruba Financieel Toezicht (Caft) ta bisa den su ultimo rapport publica dialuna riba presupuesto 2016. Mes momento gobierno (lesa minister Bermudez) a sigura NoticiaCla.com cu lo tin ‘besparing’ tambe riba personal na 2016, y tambe cu a menciona un cifra cu nan kier logra reduci. Pues aki parse di tin un contradiccion entre gobierno y Caft riba e asunto di personal.

PRECUPACION RIBA REVISION FUERTE NEGATIVO

Nan (Caft) ta preocupa riba e revision fuerte negativo, sigur mirando cu e idea pa reduci gastonan di personal, lo mester tabata 25% di e total intencion di bahada di gasto pa 2016, conforme e rapport inicial di 2014-2018. Algo cu gobierno a haci tambe den e raport nobo di 2017-2020. Mirando e cantidad grandi di gasto di personal, y e interes pa por maneha e gastonan aki riba termino y realisa un situacion financiero sano, Caft kier sa a termino corto con lo frena e crecemento autonomo di gasto, sigur riba tereno di personal, di un forma structural. Algo cu supuestamente, gobierno lo no a indica den e presupuesto actual.

MAS RIBA MANEHO DI GASTO DI PERSONAL

Pa loke ta e parti di gasto, Caft ta hopi precupa riba e maneho di gasto di personal,, ya cu den 2016 no tin ningun intento di spaar. Algo cu ta un contraste fuerte cu e intento di maneho inicial di e acuerdo di e asina yama ‘balance budget accoord’. Loke tambe ta precupa Caft, ta cu varios trayecto legal di diferente accion, manera wachtgeldregeling, personeelstop) no a wordo conclui, segun Caft. Nan ta mas precupa cu e hecho cu e trayectoria pa pasa e respectivo leynan, ta tumando hopi tempo, prome cu por realmente implementa e leynan aki, y consecuentemente pa nan por tin efecto caba. (Lesa e rapport completo di CAFT aki)