Sasha Figueroa a lansa cancion cu N’Fuzion

ORANJESTAD – E popular cantante Sasha Figueroa ta bek riba mercado cu un cantica nobo titula ‘Deseo’ cu ta un ritmo ‘tropical’. Mientras cu e banda cu ta compaña Figueroa ta N’Fuzion, no ta necesariamente nifica cu el a bira e cantante ‘nobo’ di e banda aki. “Nan a acerca mi cu e cantica aki, mi a gust’ e masha hopi mes y mi a grab ‘e cu nan” Figueroa a sigura NoticiaCla.com awe mainta. Esey no ta nifica cu e ta un ‘regular’ den e banda aki awor.

FIGUEROA CU N’FUZION

E cancion ta bin mas of menos 3 aña despues cu Figueroa a graba su ultimo cancion, e tempo ey cu Tsunami ainda. Si e ‘relacion’ nobo aki por desemboca den mas proyecto cu N’Fuzion, Figueroa no por bisa. Depende si nan tin mas cu ta bon, e ta dispuesto pa sigui produci cu nan. Y ora cu nan haci nan presentacionnan, e no tin problema pa presenta ‘Deseo’ cu nan tampoco.

E CANCION

Figueroa ta conta NoticiaCla.com cu el a keda acerca pa e productor y compositor di N’Fuzion, Hendry Tromp, cu e peticion pa graba e cancion. El a gust’ e masha hopi mes y mesora a acepta pa haci esaki. Unabes completa, a manda e version rond, y tanto na Aruba y Corsou, e tema a keda bon acepta. E siman aki den forma mas oficial, e cancion cu tin un ritmo tropical lo keda presenta y toca na tur emisora y otro outletnan musical.

FIGUEROA CU TSUNAMI

Te cu maart ultimo, Figueroa tabata milita como e estrella di e banda Tsunami. Pero diferencianan di opinion riba entre otro maneho y otro asunto, a pone distancia su mes di e banda pa ‘tempo indefini’. Awendia Figueroa ta presenta tur anochi den Hilton hotel, y ta disponibel pa presentacionnan musical priva, y ta keda bon solicita. Pero riba un ‘re-ingreso den Tsunami, of forma parti di N’Fuzion, no a wordo considera. (scucha e cantica aki)