Chaufeur di Arubus envolvi den accidente recien, reconoci pa su balentia

ORANJESTAD – Awe mainta e chaufeur di Arubus cu recientemente a bay termina den rooi durante un accidente serio, a keda reconoci pa minister Oduber y su hefe di trabou Teo Croes. Edwin Julio Bernabela tabata na stuur dia di e accidente, y ta danki na e forma con e la maniobra cu e bus, cu e situacion no a resulta den un calamidad. A duna Bernabela e titulo di embahador di bon boluntad.

RAPPORT TA CONFIRMA CU CHAUFFEUR A EVITA LO PEOR

Minister Oduber ta splica: "Segun tur e rapportnan cu nos por a ricibi ta indica cu danki na Sr. Bernabela cu tur su experiencia trahando den e ramo aki na Arubus a evita lo peor e dia ey. Mi ta haya na su luga pa publicamente gradici Sr. Bernabela di curazon den nomber di Gobierno di Aruba, pero tambe den nomber di comunidad di Aruba, pa a haci locual un bon ser humano lo haci den un circunstancia asina." Sr. Bernabela ta splica cu tur cos a pasa hopi lihe y ta gradici Tata Todopoderoso pa a gui'e y a scapa tur hende di un desgracia. E tabata un momento hopi special pa tur hende presente pa por a gradici Sr. Bernabela asina aki pa su balentia y reaccion rapido cu a evita un desgracia mayor.