CAFT: Cifranan di presupuesto final 2016 ta keda irealistico

ORANJESTAD – College Aruba Financieel Toezicht (CAFT) a emiti nan raportahe final riba e presupuesto 2016 awe tardi. E positivo ta cu e biaha aki si gobierno a presenta un memorie van toelichting cu ta duna mas splicacion di e intencion di gobierno pa cu 2016. Pero atrobe, nan (CAFT) ta laga atras 5 conseho cu nan kier pa gobierno tene cuenta cu ne. Algo cu no a cambia. Entre nan, mester tin un crecemento mas reduci di 3.5% compara cu esun cu gobierno kier trece. Ademas gobierno (atrobe) no ta tene su mes na su palabracion. "Nan mes ta sugeri un punto di salida pa para e crecemento den gasto, pero despues e mes ta aumenta esaki den e presupuesto di 2016". 

CIFRANAN NO TA CUADRA

Caft ta conclui cu a base di e cifranan di e presupuesto actual, e deficit poni di 2.0% di e PIB, no ta realistico. Caft mas bien, presentando un calculacion diferente (lesa e rapport), ta sali riba un deficit di 148 miyon, osea 2,9% di e PIB (compara cu 2.0% cu gobierno ta menciona).   Como tal lamentablemente e cifranan di gobierno ainda no ta cuadra cu e loke cu gobierno a presenta den e presupuesto 2016.

MEDIDANAN IREALISTICO

Ademas, CAFT no ta kere den e medida cu gobierno kier impone di 6% pa aumenta entrada den caha di gobierno y como tal aki tambe no ta considera nan realistico. Mes momento gobierno no ta substancia su cifranan riba esaki suficiente y como tal CAFT no por deduci un punto di bista riba dje tampoco.

INTRODUCCION LIHE DI ABB

Tambe CAFT ta pidi pa e ley di ABB (Algemene Bestedings Belasting) wordo introduci mas lihe cu ta posibel y anuncia, prome cu e presupuesto wordo aproba den parlamento. Esey, pasobra cu e introduccion di e ley, gobierno por genera 50 miyon na extra entrada.

REDUCCION DI PERSONAL

E reduccion di gasto di personal, incluyendo e participacion di e doño di trabou di 6 miyon, ta hopi menos cu e 90 miyon cu gobierno a propone pa 2016, cu a wordo publica den e ‘caminda di sanacion plural (2014-2018). Segun CAFT, gobierno di Aruba no mester busca solamente mas entrada como solucion pa su problemanan, pero tambe aumenta su reduccion di gasto, principalmente den maneho di gasto di personal.

POST PA EVENTUALIDAD

Keto bay CAFT ta para ariba pa gobierno fiha un post pa eventualidad, cu aworaki ta practicamente nihil. Como tal, manera informa caba, ta sugeri pa tin sikiera un post di 13 miyon florin pa ‘eventualidad’. Keda pendiente pa mas informacion. (Lesa e rapport completo aki)