Miembro RvT di SMAC ta ranca bel di alerta pa problema interno

ORANJESTAD – Den seno di Raad van Toezicht (RvT) di SMAC tin problema serio pa cual un di su miembronan (of ex aworaki) a dicidi di ranca e bel di alarma pa mustra su malcontento. Un di e miembronan ta mustra cu elo a wordo ‘saca afo’ di e RvT pa finnan politico. Alvin Wever, cu tabata representa e gremio comercial ATIA, a ventila su frustracion riba su pagina di Facebook den weekend, riba e hecho cu a ‘hal ‘e un banda’ pasobra ‘e kier a controla fondonan di SMAC’. ATIA su reaccion na NoticiaCla.com dialuna tabata corto y a solamente confirma cu nan a ‘distancia nan mes di SMAC door di problema den raad’.

COMENTARIO RIBA FACEBOOK

Den su comentario riba su wall entre otro, Wever ta bisa cu e tin hopi aprecio pa esnan cu a lidera e organizacion aki (ATIA) den pasado pa e por a cumpli 70 aña.” Pero loke e directiva actual a comete ta un acto di traicion y cobardia contra un miembro di su organizacion cu a tuma su tarea hopi nan serio y simplemente ta pidi cuenta y ta exigi transparencia di e bestuur di SMAC” Wever a bisa. Aki Wever ta referi cu el a wordo hala un banda, cu sosten di ATIA pa su intento di controla cifranan di e fundacion. Ademas segun Wever, simplemente trabaonan cu un RvT mester hasi ta wordo boycotia y ignora pa e bestuur cu bendicion di e Minister concerni, simplemente pasobra e ta pidi cuenta como un miembro di RvT. “Y pesey ta haña cu mester move mi di eynan y cu bendicion di ATIA” Wever ta sigui bisa.

FONDO DI PUEBLO MESTER WORDO CONTROLA

Su punto principal di keho ta cu “ SMAC a ricibi como 90% di su fondonan di placa di pueblo (Gobierno) mas ainda mi ta kere cu esaki sin mas ta rekeri cu mester tin transparencia y control. Mas prome den su comentario, e ta referi na e forma di traha di e fundacion, cu no ta corecto. “ Fondonan ta wordo gasta sin presupuesto, gastonan ta wordo hasi sin cu RvT ta duna ok. Carnaval 62 ta den pleno desarollo y RvT no ta ricibi ningun budget con ta bai recauda fondo y kico te gastonan”. E pregunta grandi ta keda: dicon tanto obstaculisa e trabou pa haya transparencia cu tanto nan a exigi di SAC? Kico tin di sconde awo?” Wever ta sigui puntra.( Lesa su precupacion completo cu el a pone riba Facebook, aki).

REACCION DI ATIA Y GOBIERNO

Ora cu NoticiaCla.com a acerca ATIA, nan tabata hopi corto den nan reaccion pa aworaki. “ATIA a prefera di distancia su mes for di SMAC door di problema den raad y cu e bestuur, pa asina duna espacio pa traha un raad nobo”, e comentario di e presidente di ATIA tabata. E minister encarga cu cultura, y cu tabata instrumental den creacion di SMAC, Otmar Oduber no a reacciona riba e peticion di NoticiaCla.com pa un comentario ainda.