Hepple: Introduci mesun tipo di visa pa Venezolano cu tin pa Colombia

ORANJESTAD – Si bo implementa e mesun tipo di visa cu esun cu a wordo aplica cu Colombia, esaki mester por funciona tambe pa Venezuela. Ehecutivo mas halto di Aruba Hotel & Tourism Association Jim Hepple ta entretene e idea pa un visa pa Venezolanonan, como un forma pa regula e situacion cu tin actualmente. Y den e cuadro aki, e ta compara e politica aplica pa bishitantenan di Colombia te cu awor. “Cualkier (colombiano) cu ta(bata) den un posicion di un visa mericano, por (a) bishita Aruba. E ora bo sa automaticamente cu bo ta atende cu un clientela cu por afford di bin. Y algo asina mester pa e Venezolanonan.

AHATA A DISCUTI POSIBILIDAD PA VISA

Segun Hepple, si aplica e mesun reglanan aki, e no ta kere cu lo tin problema. Riba e pregunta cu si AHATA ta pro introduccion di un tipo di visa pa Venezolanonan, Hepple a sigura NoticiaCla.com, cu e ta algo cu nan a discuti. “Pero na final di dia, ta un decision cu lo wordo dicidi pa Hulanda, pasobra tin tanto implicacion politico y diplomatico envolvi. Pero si, e ta algo cu nos ta haya cu ta necesario, pero ta na gobierno pa dicidi esaki.