AHATA: Hotelnan a conoce caida di 50% di turista Venezolano

ORANJESTAD – E situacion na Venezuela inevitablemente lo cambia, y no necesariamente den un forma positivo. Y como tal e CEO di Aruba Hotel & Tourism Association (AHATA) Jim Hepple a mustra su preocupacion na NoticiaCla.com riba e punto aki. Y segun e ehecutivo hotelero, e impacto negativo di e situacion di Venezolanonan tabata obvio pa Aruba. Un caida di por lo menos 50% di turista Venezolano cu no ta keda den hotelnan mas na Aruba den e ultimo tres lunanan, ta motibo pa preocupacion grandi segun Hepple. “E ta impactando un cantidad di hotel den un forma hopi serio” e ehecutivo a sigui bisa.

VENEZOLANONAN COMO REFUGIADO?

Aruba Tourism Authority (ATA) ta na altura di esaki segun Hepple, y tambe e minister di turismo. “Nos mester bin cu mercadonan alternativa, pa atende cu e situacion aki. Nos speransa primordial ta cu e situacion na Venezuela no deteriora na e punto cu porta nos mester atende cu ‘refugiadonan’. Mi ta sigur cu gobierno tin un plan pa atende cu esey” Hepple a sigui bisa, refiriendo na e situacion cu por surgi si e situacion na Venezuela sigui empeora. E no ta haci mencion di e eleccion di dia 6 di december, pero esey ta e momento unda cu cos por cambia radicalmente y crea un posibel situacion di exodus for di e pais bisiña, y den esaki, den forma di refugiado.

IMPACTO PA HOTEL TA VARIA

Loke ta interesante ta cu e number di Venezolanonan cu ta keda den hotelnan ta varia hopi dependiendo di e hotel. Como tal ela impacta algun hotel mas cu otro. Como ehempel, Hepple ta nombra Marriott, Ritz Carlton, Hilton y Hyatt cu ta ‘cater’ primordialmente na e mercado Mericano. “Nan no a wordo impacta mes hopi cu p.e. Tropicana, Renaissance, the Mill y otro”. Segun e hefe di AHATA, nan ta purbando di atende e problema aki.