Polis a detene tres homber Sirio cu pasaporte falso na St Maarten

SIMPSON BAY – Polis na St Maarten a aresta tres homber (3) cu a purba drenta e isla diasabra usando documentacion falso. Tur tres persona ta parse di ta di identidad Sirio, cu a yega e aeropuerto anochi riba buelo di Insel Air for di Haiti. Asina cu nan a yega, a detecta e documentonan falso, pa cual mesora a detene nan.

DOCUMENTACION FALSIFICA CONFIRMA

E sospechosonan a wordo entrega na e asina yama ‘back office’ cu a sigui investiga e documentonan y a determina cu e pasaporte nan Griego cu e hombernan tabata biaha cu ne, enberdad tabata falso. E sospechosonan a keda deteni pendiente mas investigacion.

ALERTA PA CUALKIER EVENTUALIDAD

Mientrastanto polis a urgi miembronan di comunidad pa ta alerta y procede cu cautela, mirando e situacion recien na Francia. Mes momento a mustra cu autoridad cu ta atendiendo cu infrastructura critico, a wordo urgi pa keda alerta pa cualkier actividad of persona sospechoso. A urgi nan tambe pa alerta polis den casonan asina.