Censo: Pa mei 2016 lo cuminsa procesa y otorga cedula atrobe

ORANJESTAD – Si tur cos ta bon, pa otro aña mei, (16 luna despues cu a stop di emiti cedula na Aruba) lo cuminsa atrobe cu otorgamento di cedula. Y ora cu esaki cuminsa, e lo ta un cedula produci netamente na Aruba. Pa por logra esaki, Censo a cera un acuerdo cu un compania Hulandes renombra riba e tereno aki, cu aki 6 luna mester ta cla pa ehecuta e proyecto aki, balora na casi un miyon florin, y subsidia pa Fondo Desaroyo Aruba. Y e hefe di censo Sharin Luydens tin 100% confiansa cu e proceso nobo y e cedula nobo, lo ta e miho cu tin pa nos isla.

PRESENTACION NA PRENSA

Den un presentacion recientemente pa prensa, Luydens a presenta e detayenan di e cedula nobo aki, y hunto cu ne, e protagonistanan cu lo ta encarga cu e proyecto ambicioso aki. Ambicioso, pasobra tin un retraso grandi cu tin cu bay atende cu ne, y mes momento procesa peticionnan nobo.

CRITERIA PA TRAHA CEDULA NA ARUBA

E motibo principal segun Luydens pa para e proceso di cedula, elo a significa cu mester a sigui 3 aña mas cu e compania cu ta traha e carchi aki na Hulanda. Algo cu no ta eficiente segun e hefe di censo. A base di e factornan ey, minister a bay di acuerdo cu conseho di Censo, pa traha e carchinan na Aruba mes. Y basa riba esaki a traha un terms of reference cu ta determina kico tur mester pa Aruba.

EXPERIENCIA DI MULTIPOST

Despues di un destaho publico, e compania Multipost a haya e derecho pa e proyecto aki. Nan ta experto den e trabou aki tanto den region BES como na Europa. Interesante ta cu Aruba lo haya e propiedad intelectual di e software pa e carchinan aki tambe. A splica tambe cu ta trata di un proyecto cu documentonan oficial di un pais, unda cu mester tene cuenta cu diferente factornan. Entre otro e software ta uno cu medida di seguridad.

TECNOLOGIA USA PA E CARCHINAN

A haci un escohencia tambe riba e tecnologia cu lo wordo uza, unda cu scohe pa esun di polycarbonaat kaart, unda cu a opta cu ta keda cu esun aki mes. Motibonan ta hopi, pero algun punto manera material duradero, y tambe cu ta usa material mas sigur di e tecnologia di laser cu ta personaliza e carchi manera bo firma y potret den e carchi. E carchi lo haya asina su reconocemento manera un ‘voelbare relief, kinogram y mas’.