Lo no trata Algemene Rekenkamer diferente pa asunto di parkeer

ORANJESTAD – Tur hende den asunto di parkeer, ta wordo trata mescos. Y como tal, esaki ta conta tambe pa e personal di Algemene Rekenkamer Aruba(ARA). Den un reaccion pa NoticiaCla.com, minister responsabel pa parkeermeter, Otmar Oduber ta mustra cu “Tur hende ta wordo behandeld mescos”. Como tal tur hende ta haya e mesun trato, incluyendo personal di ARA. Esaki ta a base di carta di critica di e personal di ARA recientemente unda nan ta mustra nan desaprobacion con nan ta wordo atendi den henter e asunto di parkeermeter.

CARTA DI DISGUSTO DI PERSONAL DI ARA

Den un carta fecha 2 di november ultimo, e personal di ARA ta mustra cu nan no ta contento cu e forma di proceder, splicando cu nan ta wordo ignora, y awor a keda sin haya parkeervak (cerca) di e edificio y awor tin cu sufri cu e asunto di parkeer. E lugar asigna di parkeer lo ta mucho leu di nan edificio, cu ta obstaculisa nan operacion diario. Den e carta, nan ta relata entre otro riba e intercambio di corespondencia, of falta di esaki, cu a conduci na e disgusto y e resultado conoci. Entre e puntonan, nan ta mustra con nan nombernan lo a wordo poni riba un lista di espera hunto cu por lo menos 200 persona pa un solucion y cu por lo pronto (te cu 15 di november), Aruparking lo no por otorga permisonan mas di parkeer.  

REACCION DI DIRECTOR ARUPARKING

Den un reaccion di e director di Aruparking, Teo Croes, e tabata basta corto. “Nos ta trahando pa wak con nos por acomoda nan pa nan por yega mas serca , pero e no ta defini ainda” Croes a bisa den un reaccion cortico. “Pa parti di Aruparking, tur empleado di gobierno y priva a reacciona y bin busca lugar di parkeer” Croes ta sigui bisa. E ta mustra tambe cu e personal di ARA a tarda pa reacciona. “Nan a bin awo cu e lugar a wordo cera (e lugar di parkeer ‘priva’ di ARA:red), dus ya loke tin direct available awor ta Arubus y Port of Call. E tabata a base di first come first serve, dus esunnan cu a bin prome a haya lugar mas serca” Croes ta sigui bisa.

REACCION DI MINISTER DI TRANSPORTE

Pa loke ta e reaccion di e mandatario encarga cu transporte, el a mustra cu ‘Tur hende ta wordo behandeld mescos. E ta un ley, y e unico cu tin excepcion riba e ley ta pa polis, ambulance y brandweer. Y naturalmente semper cu por acomoda, AruParking lo purba acomoda e hendenan. Naturalmente tur hende tin mesun derechonan. Y no por bay kita un hende cu un luna pasa, a busca un lugar eybanda, cu si a bay na tempo, pa kit ‘e djeynan y duna otro hende. Kiermen tur hende mester wordo trata na un forma igual” Oduber a finalisa bisando.

LEY PA UN Y TUR

Cu esaki, e ta mustra cu e mesun reglanan ta conta pa ARA, y cu no por desvia di esey, aunke cu ta trata di ARA. Tur hende ta wordo trata di e mesun forma, y cu esunnan cu a bin prome, ta haya prome.