Ling & Sons: Nada malo cu a move benta di cerbes pa e tienda ‘bieu’

ORANJESTAD – Ningun momento Ling & Sons a haci cos ilegal y for di sla. Asina e director Richard Eman ta reacciona na NoticiaCla.com riba e critica cu tin cu e supermercado ta bende cerbes cu Venezolanonan for di porta patras. “Ling & Sons ta bende cerbes cu tur hende cu yega cerca nos” Eman a bisa. “Bo ta paga, bo ta haya bo cerbes y bai cu ne” Eman a sigui bisa. Mes momento Eman ta admiti cu a move e benta di cerbes pa patras si.

BENTA DI CERBES REGULAR A BIRA FASTIOSO

Segun Eman, bende cerbes den e tienda regular a bira fastioso cu tanto hende para den rij. “Nos a saca e benta di cerbes y hib'e pa nos tienda bieu ( paden) na unda nos tin nos articulonan di wholesale. Nos cliente regular a keda contento cu nan por hasi nan compras atrobe den tur trankilidad. P'esey a move benta di cerbes pa patras” Eman a sigui bisa. A mustra te hasta cu e 3.5% di BBO/BAZV nan ta cobra y draag af na gobierno tur luna. Pues nada malo, nada straño of ilegal.

OPERACION DI VENEZOLANO

Riba e pregunta, con e Venezolanonan sa unda pa bay, Eman a contesta simplemente “ E Venezolano nan sa cu nan mester bai na tienda bieu”. “E cliente Venezolano ta yega cu un paspoort valido, credit card valido; ta swipe y e transaccion ta pasa door di credit card machine di nos banco local. Nan ta cumpra nan cerbes y ta bai nan caminda. Mi no ta weita ningun acto ilegal den esaki” Eman a finalisa bisando.

CRITICA RIBA FACEBOOK

E critica a bin ora cu diripiente riba Facebook entre otro, a cuminsa post e potret di e parti patras ‘bieu’ di Ling & Sons, unda cu tabata mira Venezolanonan cumpra y bay cu gran cantidad di caha di cerbes, indicando como si fuera tabata algo ilegal cu tabata sosode.