Total di 5 partido lo a haya otro pa forma gabinete Whiteman 2

WILLEMSTAD – Varios fuente ta confirmando na Corsou diadomingo anochi cu e partidonan Pueblo Soberano, PAIS, PAR, PNP y independiente Sulvaran a yega na un acuerdo pa forma un gobierno nobo. Esey lo ta nifica cu no ta bai tin eleccion adelanta, manera cu a pensa originalmente. Partidonan lo a traha duro den fin di siman, pa keda cla cu e acuerdo aki. Partido PAIS tabata e prome y practicamente unico partido cu a participa publicamente riba nan pagina di Facebook, cu nan a firma pa participa den e gabinete nobo aki.  

INFORMADO NOMBRA

Prome minister Ben Whiteman a keda apunta como informado prome cu weekend, cu e tarea pa toch purba forma un gobierno temporal pa pais Corsou, y e tin te 16 di november pa haci tal. Esey ta e resultado di e reunion cu tabatin ayera entre gobernador Lucille George Wout y Whiteman. (lesa e carta di gobernador aki).

MOTIBO PRINCIPAL PA PETICION

Motibo principal pa e peticion aki, ta ‘e necesidad pa un continuidad di gobernacion y tambe e hecho cu tin algun asunto importante riba tereno financiero y social economico cu mester wordo atendi. Y mirando cu e proceso cu ya caba ta den funcion, ta necesario pa esaki continua aworaki. Ademas ta conoci cu den di dos mitar di 2016 lo tin eleccion caba na Corsou. Analisando tur e puntonan aki, gobernador a haci un apelacion toch cerca Whiteman pa sondea e posibilidad un biaha mas, aunke cu na prome instante a indica cu no tabatin disponibilidad di partidonan.

DISPONIBILIDAD

Gobernador a pidi Whiteman pa sondea e posibilidad pa si tin disponibilidad riba termino cortico, pa cera un gabinete cu ta conta cu un mayoria y cu ta dispuesto pa adresa e situacion menciona. Whiteman tin cu raporta bek cerca gobernador dia 16 di november proximo, esta dialuna awor. FOTO cortesia Yves Cooper.