Minister a kita permiso di MUSICA pa organisa festival den Carnival Village

ORANJESTAD - Carnaval 62 a conoce su prome conflicto grandi, awor cu minister a revoca permiso di fundacion MUSICA pa tene festival Caiso y Monarch den Carnival Village. Informacionnan confirma cu NoticiaCla.com a pone man ariba, ta mustra cu pa motibo di informacion incorecto y infunda, minister di infrastructura Benny Sevinger a hay'e ta revoca e permiso en cuestion. Algo cu e mandatario no a aprecia nada mes cu e.o. minister di cultura tin cu resolve e ‘problema’ aki awor.

SEVINGER A KITA PERMISO 

E mandatario responsabel pa infrastructura, inicialmente a firma e permiso pa MUSICA na october, pasobra e tabata ‘bou di impresion cu MUSICA a haya un ‘permiso’ di e vergunning houder di actividadnan carnavalesco, esta SMAC. Pero diabierna ultimo esaki a keda revoca, cu ta pone cu awor MUSICA no tin un lugar pa e festival, y cu mester organisa esaki posiblemente otro caminda.

REACCION DI MINISTER DI CULTURA

NoticiaCla.com a acerca e mandatario responsabel pa carnaval diadomingo anochi esta Otmar Oduber, cu a confirma cu tin reunionnan andando tras di cortina pa sigura cu cosnan ta anda bon. E mandatario a confirma tambe cu dialuna mainta trempan lo tin un reunion entre e mandatario y e gruponan concerni, y cu cosnan lo mester tabata bay positivo.

TRAS DI PORTA

Informacion confirma di otro fuente ta mustra tambe cu MUSICA lo tabata purba tur forma pa papia cu entre otro polis y otro ministernan, aparentemente evitando e minister di cultura y e organisacion di carnaval. NoticiaCla.com a busca contacto cu miembronan di MUSICA, pero no a logra ainda.