Maestronan di SKOA preocupa pa situacion alarmante di nan scolnan

ORANJESTAD - Maestronan di SKOA ta preocupa pa e situacion alarmante di nan scolnan. Asina e sindicato cu ta representa nan, SIMAR, ta participa den un comunicado. Segun e sindicato, lo no dura hopi tempo pa material caba. Tin algun scol cu ya ta den problema cu cierto articulonan a caba; manera papel pa copia, toner, material di limpiesa y papel di wc etc. Mientras cuentanan di SKOA ya a cuminsa cera.

CASO DEN CORTE

Actividadnan no por tuma lugar manera custumber ya cu no tin fondo y no por uza e poco entrada cu a ricibi di mayornan. Esaki ta debi na e sentencia di huez den e caso di algun mayor contra SKOA y tambe na e echo cu ta sperando resultado di e “bodemprocedure”. Maestronan cu semper a percura pa tur cos cana nechi dunando di nan parti, entre otro hincando man den nan propio cartera y recaudando fondo na diferente forma, a cansa di e situacion penoso aki.

REUNION URGENTE

Pa e motibonan aki, SIMAR como sindicato cu semper ta traha pa bienestar di enseñansa en general, a haci un yamada na maestronan di scolnan di SKOA pa asisti na un reunion urgente cual lo tuma lugar diamars 17 di november pa 7:00 pm na cede di SIMAR na Sabana Blanco.

PUNTONAN DI AGENDA

Den e reunion aki lo trata entre otro e puntonan cu ta preocupa SIMAR lo duna espacio na e maestronan pa expresa nan puntonan di preocupacion. Tanto miembro, como no-miembro ta bon bini na e reunion aki. Un boca bisa otro. Trece bo colega. Bo presencia lo ta aprecia.