ATIA: Preocupa cu stagnacion fluho “clearance” di container na Aduana

ORANJESTAD - ATIA representando comercio tawata tin un reunion cu directiva di Departamento di Aduana encuanto accionnan di control cu a wordo intensifica e siman aki. Miembronan di ATIA preocupa a bati na porta pa haya sa mas informacion relaciona cu e accionnan di control cu ta tumando luga, mirando cu esaki a bin ta afecta e fluho di “clearance” di containernan na Aduana pa asina clientenan por ricibi nan carga.

AUTORISACION PA CONTROLA 

Durante e reunion varios puntonan a wordo trata. Aduana di su banda a splica cu nan tin autorisacion pa controla y cu a tuma e desicion pa controla e sistema nobo di ASYCUDA. E control aki lo dura en total 5 siman y ta pa wak entre otro con e sistema ta funcionando, pa conoce e clientenan di Aduana miho y alaves hisa compliance. Durante e control aki a pone mas personal di Aduana pa limita e efecto cu esaki lo por tin riba comercio. ATIA por a compronde di parti di directiva di Departamento di Aduana cu e accion aki a wordo anuncia anteriormente den corant pa asina prepara comercio. Pero cu esaki no ta bai ta e caso pa controlnan den futuro.

STAGNACION DI FLUHO DI CLEARANCE

ATIA di su banda a expresa e preocupacionnan di su miembronan encuanto e stagnacion di e fluho di “clearance” di containernan na Aduana. Ta importante pa tene consideracion cu nos ta yegando e temporada di fin di aña caminda cu varios companianan ta finalisando diferente proyectonan of ta bezig ta stock productonan pa fin aña. Mester bin cu alternativanan pa limita e efecto cu e accionnan di control tin riba comercio. Pa loke ta esaki directiva di Departamento di Aduana a informa cu nan lo bai hasi algun ahustacionnan pa asina stabilisa e fluho bek na normal. Por a compronde cu pa otro siman e efectonan di esaki lo ta bai ta menos. ATIA y directiva di Departamento di Aduana ta haya cu ta importante pa tin comunicacion continuamente. Tambe a yega na un acuerdo pa reuni atrobe despues di e 5 simannan di control pa presenta e resultado y evalua con esaki a bai den cuadro pa sigui mehora e calidad di servicio di Aduana.