Medionan di comunicacion local mester promove nos cultura

ORANJESTAD - Medionan di comunicacion tin cu promove nos cultura. Director di Departamento di Cultura, drs. Siegfried Dumfries durante Cumbre Nacional di Cultura 2014 a expresa cu e medionan di comunicacion local tin un rol importante den cuadro di promove nos cultura. Esaki el a bisa na momento di cita e puntonan cardinal pa logra nan obhetivo, esta yega na un maneho integral di cultura, siguiendo e maneho di Minister di Cultura, Sr. Otmar Oduber.

Esaki ta un di e prioridadnan di DCA. Trahando hunto cu participantenan y stakeholders ta e caminda ideal cu lo mester percura pa sigui stimula despues di e Cumbre Nacional. DCA ta mira esaki como un compromiso no solamente pa logra skirbi e nota di implementacion, pero tambe pa yega na ehecuta esaki ta rekeri suministra medionan di comunicacion regularmente cu e informacion necesario di cada actividad. Esaki mester ser publica y tambe prensa mester asisti na e actividadnan aki, pues trahando estrechamente cu tur medio di comunicacion pa promove e actividadnan cultural.

Cu presentacion di e diesdos puntonan di accion, cualnan ta resultado di e rondanan consultativo cu a ser teni den lunanan di maart y april ultimo cu tur stakeholders, por bisa cu DCA ta riba e bon caminda pa realisa su meta.

Enfasis a ser poni riba enseñanza, a ilustra cu educacion ta e instrumento pa eleva Arte y Cultura, sin descarta e aspecto di archiva y digitalisa documentacion di historia y herencia cultural di Aruba. E nucleo di e trabou ta encera inventarisacion, analisis y optimalisacion educacion di Arte y Cultura. Naturalmente mester por haci e material educativo accesibel pa un y tur tanto grandi y chikito.  

Hopi ta e comentario cu Arte y Cultura na Aruba no ta un fuente di entrada primordial. Sin embargo esaki no mester descurasha nos. Nos mester sigui analisa e personal den sector cultural y boluntarionan y crea un ambiente unda organisacionnan por traha hunto intercambiando nan experiencia y compartiendo nan facilidadnan pa di e forma aki mehora e producto “ARUBA”.

Educa nos organisacionnan cultural y educativo con pa haci bon uzo di e fondonan disponible y duna mas balor na nos artista- y musiconan local. E caminda ta uno largo, pero manera e lema di e Cumbre Nacional mes ta bisa “Hunto nos por delinea e puntonan di atencion pa yega na un maneho integral di cultura y ehecuta esaki conhuntamente.