Yiu di Corsou Simmons traslada pa Los Angeles Angels

ATLANTA- E pelotero profesional yiu di Corsou Andrelton Simmons di Atlanta Braves a wordo traslada pa e ekipo di Los Angeles Angels awe. Braves y Angels a traha un deal pues, cu lo manda Simmons, miho conoci como ‘Simba’ pa Anaheim. E prome cu a plama e noticia tabata Jesse Sanchez di MLB.com. Entre esnan cu ta bay Atlanta bek den e deal, ta Erick Aybar. Hunto cu Aybar, Braves ta haya tambe dos pitcher, Sean Newcomb y Chris Ellis. Hunto cu esey, Braves ta ricibi 3 miyon di Angels. Esey lo mester yuda e salario di Aybar di 8.5 miyon den 2016.

DETAYE DI CONTRACTO

Simmons di 26 aña di edad, a firma un extension di su contracto, balora na 58 miyon dollar cu Braves na 2014, cu ta elimina su añanan di arbitrahe. Esey ta nifica cu e ta keda bou contracto, te 2020. Mientras cu su bateo no tabata mucho cos, ta su defensa a dun'e e titulo di e di dos hungador mas valioso di Braves pa 2015. De hecho, diaranson MLB a nombra Simmons como e hungador defensivo di aña 2015 pa MLB.