Negoshi tumando paso pa controla Venezolanonan problematico

ORANJESTAD – Prohibi aceptacion di credit card di Venezuela, y restringi cantidad di Venezolano cu por drenta un tienda den grupo. Asina lew e situacion a yega na Aruba e siman aki, relaciona cu e Venezolanonan cu ta bin Aruba cu menos bon intencion. Doño di un negoshi grandi popular, a confirma na NoticiaCla.com diahuebs cu e mester a tuma e medidanan pa por tin miho control riba e Venezolanonan problematico aki. E ta splica asina e necesidad pa pega aviso riba su negoshi pa tur Venezolano mira.

MODUS OPERANDI DI E VENEZOLANONAN

E situacion comercial cu turistanan Venezolano cu ta biniendo Aruba cu mas intencion cu pasa un dushi vacacion, ta birando mas y mas problematico. “E problema ta cu nan (Venezolanonan) ta drenta cu grupo di 5 (hende) y ta pidi tur tipo di atencion. Anto despues bo tin un otro grupo ta drenta. Bo no por controla(nan mas)” e propietario ta sigui bisa. “Tin robo ta pasa constantemente” e doño a continua. Como tal prome mester a pidi e grupo pa keda na porta, pero despues gewoon no por a acepta gruponan mas. Ta puro problema e cos aki tabata trece”.

CREDIT CARD CU NO TA PASA

Pa loke ta e credit card, e doño a splica cu no ta sigur cu e placa di e ‘turista Venezolano’ ta ‘clear’. “Y nan (e Venezolanonan) no por warda dos tres dia pa e clear. Si acaso nan warda, ok, esey no ta un problema. Pero esey ta masha tiki” e doño a sigui bisa. Y asina tin mas doño di negoshi cu a cuminsa para e modus operandi di e Venezolanonan cu ta bin cu intencion pa haci algo mas cu pasa un bon vacacion.

IMAGEN DI VENEZOLANONAN NO TA BON

Esaki ta solamente un di e hopi ehempelnan cu tin aworaki na Aruba, ora ta regarda Venezolanonan. E peor ta cu uno ta daña pa e otro. E situacion a bira asina tristo, cu hende ya no kier tende e nomber di Venezolano ora cu ta haci compras. Asina cu tende cu ta un Venezolano, e tono di voz ta cambia y e persona den tienda ta cambia nan actitud pa cu e cliente. Y e por ta un cliente cu kier y ta dispuesto pa paga hopi placa, pero cu pa motibo di ta un venezolano, ta haya un trato inferior. E situacion a bay aun mas leu unda cu venezolanonan residencia na Aruba, ta haya nan mes den un situacion asina, unda cu nan ta wordo trata manera ta carpata nan ta, djis pasobra nan ta Venezolano. “Asina cu nan tende cu nos ta Latino, of peor ainda, Venezolano, nan actitud pa cu nos ta cambia. Nos ta biba aki. Hopi aña, pero ni asina. Un lastima esaki ta”, un Venezolano a splica NoticiaCla.com e siman aki. Gobierno mientrastanto ta haciendo tur lo posibel pa purba atende cu e situacion aki, prome cu e bay for di man. Den practica, no a sinti mucho, pero ta wordo bisa cu algo ta wordo haci, pa por remedia e situacion.