Di cinco persona deteni den caso atraco Excelsior Casino

ORANJESTAD - E di cinco persona a keda deteni den e caso di atraco di Excelsior Casino. Ta trata di e homber local di inicial A.E.A, segun vocero di ministerio publico Ann Angela a confirma awe mainta pa NoticiaCla.com. Segun Angela, e persona aki a keda deteni diaranson mainta na su cas. Informacion adicional cu NoticiaCla.com tin, ta cu esaki a sosode na Dakota. E persona su 'rol' den e caso aki, tabata pa suministra e pandiya cu arma. "E ta wordo sospecha di ta esun cu a percura pa arma" e vocero a sigui bisa NoticiaCla.com. Cu e detencion aki, e cantidad di persona deteni pa e caso aki, ta bira pues 5. Tres ta homber Venezolano, uno ta un muher Colombiano, y awor un homber local. E prome 4 nan ta den detencion ainda, aunke mucho mas informacion (pa motibo di seguridad) no por a wordo duna. No ta descarta cu mas persona por keda deteni ainda.

DETENCION DI E DI 4 PERSONA

E di 4 persona a keda deteni dia 3 di november anochi relaciona cu e atraco di Excelsior Casino. “Mi por bisa bo cu polis a detene un di cuater sospechoso den e investigacion na e atraco riba Casino Excelsior na Holiday Inn”, vocero di OM a bisa e dia despues. Segun Angela, tabata trata di e muher J.U.L. “

IDENTIDAD RECONOCI PA OM

Pa loke ta e detencion laat ayera diadomingo anochi di e tres sospechosonan pricincipal di e atraco di dia 26 di october, OM a identifica nan e siguiente dia cu ta e tres personanan sospecha di a atraca e casino Excelsior Casino. Asina vocero di ministerio publico Ann Angela a sigura NoticiaCla.com. Mientras cu for di ora e noticia a keda conoci cu a ‘detene’ e tres atracadornan, e pregunta tabata si por a confirma esaki. Segun Angela por confirma cu enberdad ta e tres personanan aki.

SIN PLACA OF ARMA

Ora cu a gara e tres personanan aki e diadomingo anochi, nan no tabatin arma of pero si placa den nan poder, segun Angela a bisa. Pa motibonan obvio di seguridad, Angela no por a duna detaye di nan proximo paso, esta ki ora y dia e tres personanan aki tin cu bin dilanti huez comisario. “Nos no kier bisa”, Angela a contesta riba e pregunta ey. Pa aworaki, esey ta e informacion cu por a keda suministra. Angela a bisa si, cu mientras cu e investigacionnan ta siguiendo, no ta exclui mas detencion cu por cay den e proximo ora, dianan nos dilanti. Esaki ta depende di con e interogacionnan ta bay y kico mas e investigacion ta trece dilanti.

.