Sobrinonan di prome dama di Venezuela deteni y extradita pa Merca

NEW YORK – Autoridad Mericano a detene dos subrino di prome dama di Venezuela y presidente Nicolas Maduro na capital di Haiti Port-Au-Prince y extradita nan mesora pa Merca. Asina e agencia noticioso REUTERS ta raporta.  Ta trata di dos subrino di Cilia Flores, cu a wordo gara cu 800 kilo di cocaina. Nan lo a cay den un trampa, ora cu nan a comunica cu un supuesto narcotraficante na Honduras, cu a resulta di ta un informante di DEA.

DEA A FILMA

DEA (Drug Enforcement Agency) a filma henter e proceso ora cu e sobrinonan di Cilia Flores tabata discuti e calidad di e cocaina cu nan tabata pa trafica. E cargacion cu nan tabata trafica, tabata balora na 80 miyon dollar. Tin informacion cu pa diahuebs awor e dos sobrinonan aki tin cu presenta dilanti un hues den corte na New York.

INTENTO DI IMUNIDAD

Informacion cu NoticiaCla.com ta ricibi for di su fuentenan periodistico na Venezuela ta sigui raporta cu e sobrinonan, unabes cu nan a keda deteni, a presenta pasaporte diplomatico y a purba di uza nan supuesto inmunidad. Nan a identifica nan mes como sobrino y yiu di e prome dama di Venezuela Cilia Flores, pero DEA a rechasa e inmunidad ey.

SILENCIO HERMETICO NA VENEZUELA

Ademas for di Venezuela, e mesun fuentenan periodistico di NoticiaCla.com ta raporta cu e noticia ta ‘hermeticamente sera’ y cu medionan di gobierno no ta publicando absolutamente nada di esaki, siendo cu rond mundo, y rednan internacional manera AP, Reuters y CNN ta raportando esaki internacionalmente. CNN a purba di comunica cu agentenan di gobierno Venezolano, pero nan ta nenga di contesta. “Nan ta spera di cu mayan presidente Maduro adresa e situacion aki.