IBISA cu chekeo di salud, supermarket tour, y mas

ORANJESTAD Aruba su incidencia di Diabetes, tambe yama “malesa di sucu”, ta hopi halto y e aña aki un biaha mas e “Plataforma di Salud” ta dedica henter un luna na actividadnan pa concientisa comunidad y brinda sosten na pashentnan.

LIFESTYLE PA DIABETICO

Iraida Thijsen, miembro di e team di salud na IBISA ta splica cu diabetes tipo 2 ta un enfermedad cu den hopi caso por wordo preveni pa medio di un “lifestyle” saludabel. Ademas, pashentnan cu tin Diabetes tipo 2 por evita y preveni complicacionnan si nan mantene un lifestyle saludabel cu suficiente actividad fisico y cuminda apropia.

ACTIVIDAD DI CONCIENTISACION

IBiSA como miembro di e “Plataforma di Salud “ durante di dos siman largo ta dedica na actividadnan di concientizacion riba Diabetes. For di dia 9 pa dia 13 di november tur dia e Bus di Salud lo ta ofreciendo chekeo medico na diferente supermarket for di 12or di merdia pa 7’or di anochi. E siman siguiente e actividadnan di concientizacion y chekeo medico ta continua den diferente bario.

SCHEDULE DI BUS DI SALUD

Di acuerdo cu e schedule di Bus di Salud, paden den e mesun supermercado, lo tin nutricionista y dietistanan haciendo un asina yama “supermarket tour” cu personanan cu tin diabetes pa asisti nan den haci e miho escogencia pa cu nan alimentacion. Nan lo comparti hopi tip valioso, nan lo siña e pashentnan con pa tuma e miho decisionnan pa nan mes y lo conseha tambe cua productonan nan mester evita. Bishita na e Bus di Salud no ta rekeri registracion, esaki di custumber ta un servicio gratis y tur persona diabetico y no diabetico por acudi na e bus. Pa loke ta trata e supermarket tour ta pidi comunidad pa yama IBiSA y registra. E “Supermarket Tour” tambe ta gratis y tur esunnan interesa mester yama telefon 5824987 na IBiSA pa inscribe na su supermarket di preferencia. E “Supermarket Tour” ta tuma luga for di 10or di mainta pa 12’or di merdia, como tambe di 5’or pa 7’or di atardi. E schema di a Bus di Salud y e “Supermarket Tour” ta como lo siguiente : dialuna 9 di november – Save-a-Lot San Nicolas; diamars 10 di november – Superfood, Noord; diaranson 11 di november – S.Chow, Savaneta; diahuebs 12 di november – Ling & Sons; y diabierna 13 di november – New Super Food Center, San Nicolas. E siguiente siman, esta di dia 17 pa dia 20 di november, Bus di Salud lo ta para na diferente punto rond Aruba pa ofrece chekeo medico gratis. Bus di Salud ta conta e siman aki cu cooperacion di Botica di Servicio y lo ta presente for di 8’or di mainta pa 3or di atardi na e siguiente luganan: dialuna 16 di november na e misa di Tanki Leendert; diamars 17 di november na Santa Cruz na e pleintje na Wit Gele Kruis; diaranson 18 di november na Centro di Bario Noord; diahuebs 19 di november na YMCA San Nicolas; y diabierna 20 di november na Botica di Servicio na Eagle, den bicindario di hospital.

FUN WALK Y EVENTO DI CONSCIENTISACION

E otro actividad organisa pa IBISA y partnernan den e area di prevencion, hunto cu plataforma di salud, ta e Fun Walk di seis kilometer cu ta tuma luga riba Dia Mundial di Diabetes. IBISA ta invita tanto pashentnan di diabetes, como miembronan di nos comunidad cu kier demostra nan apoyo y yuda cu concientisacion tocante e enfermedad aki, pa participa na e caminata. E ta un actividad cu no tin premio di coremento, si no ta un momento pa pasa bon y haci ehercicio pa un bon causa.

CAMINATA

E caminata ta tuma luga for di 6or y mey di mainta y ta cuminsa na Centro Deportivo Betico Croes. Despues di e caminata Fundacion Movimiento ta bida y Plataforma di Salud ta organisa un mainta di concientisacion. Durante di e mainta aki e mensahe principal ta “Bida ta Dushi…Check bo sucu…” lo tin oportunidad pa check sucu gratis cu ayudo di diferente instancia. Bus di Salud lo t’ei pa chekeonan mas extenso y lo tin dietista, nutricionista y companianan cu ta duna conseho encuanto di sapato, y otro organisacionnan cu ta duna conseho tocante di un forma di bida saludabel pa preveni diabetes y pa controla e efectonan di e enfermedad. Iraida Thijsen ta invita tur persona interesa den nan salud en general pa uni na e eventonan pa Luna di Diabetes y biba mas consciente, mas saludabel, cu nan sucu bao control.