Asociacion ASHA di specialista a keda presenta ayera

ORANJESTAD - E asociacion nobo di specialista (ASHA) a presenta nan mes ayera na prensa. E directiva di 4 persona, presidi pa Wicha Ponson-Wever, a tene nan presentacion na prensa ayera, unda cu banda di Ponson, a presenta e demas miembronan. Entre nan, e vice presidente y secretario Alexander van Straten (radioloog), tesorero Stuart Wills (docter di pulmon), y miembro Karina Kelly (internista). Banda di nan, tin un secretaria pa asisti cu ta Chantal Valize (beleidsmedewerker). Segun Ponson, e asociacion a keda oficialisa dia 4 di september ultimo ora cu nan statutonan a keda publica den landscourant. A splica cu pa hopi aña caba e specialistanan medico na Aruba ta uni den un staf medico cu un directiva di staf na hospital. Algun aña pasa a dicidi di formalisa esaki unda cu a lansa un asociacion, pa asina e specialistanan tin un posicion oficial y legal den comunidad. Contrario na otro asociacion di specialista, ASHA ta representa tur specialista medico na Aruba, tanto priva como esnan den servicio di hospital. 

META

E metanan di e asociacion ta pa mehora e calidad di cuido medico na hospital na Aruba y traha pa bienestar di como 80 specialista na Aruba, comunicacion entre e miembronan y otro partidonan interno y externo (p.e. e directiva di HOH, Raad van Toezicht, AZV, minister VOS, ABV etc), cooperacion cu otro asociacion di docter (p.e. VMSA, ASV, HAVA) participacion den maneho di hospital. E vision di e bestuur di ASHA ta, transparencia pa tur miembro tocante nan actividadnan, integridad ariba tur tereno y participacion activo y decidido den negosacion cu otro partidonan.