Asociacion di specialista no ta na altura di keho contra specialistanan

ORANJESTAD - E asociacion di specialista di hospital (ASHA) recien lanta (ayera), no ta na altura di e keho entrega pa partido UPP un dia prome, contra un grupo di specialista di hospital. Presidente di e asociacion recien lanta, Wicha Ponson-Wever, a reacciona cauteloso riba pregunta di NoticiaCla.com, indicando cu nan mester studia e caso prome cu nan por duna nan comentario. "Nos tin cu wak kico ta nos rol. Aworaki mi no por contesta e pregunta ey" Ponson a bisa. El a mustra cu no ta asina cu nan ta bay defende specialista den corte of algo asina. Nan tin nan procedura interno pa handle problema cu specialista, pero den e caso di e keho, nan rol no ta defini 'ainda'. Si nan wordo envolvi mes, ta depende kico sali for di e investigacion. "Nos no ta un asociacion pa yuda den e sorto di casonan asina" Ponson a sigui bisa. Nan rol ta mas bien den caso ora un specialista 'desfunciona', of sea no ta funciona bon como specialista.