Sistema no actualisa di aerolinea ta stroba turista keda largo na Aruba

RHODE ISLAND — Un problema di interpretacion di regla y documentacion, ta creando problema pa turistanan cu ta bin Aruba pa hopi mas cu 30 dia. E confusion ta entre e grupo di turista cu ta bin Aruba menos cu 30 dia y esnan cu ta bin mas di 30 dia. Y pa completa e obra, e falta di comunicacion entre e instancia internacional di aviacion IATA y su sistema TIMATIC (un sistema cu e ta alerta tur aerolinea kico e proceduranan ta pa drenta un pais (lesa e procedura aki) y e aerolineanan a pone cu turistanan cu si ta documenta, ta wordo perhudica. Recientemente un turista a haya su mes den un situacion asina. Esey a pone cu e la perde su vacacion completo ora cu un empleado di un aerolinea, siguiendo, -segun e trahado-, e reglanan di IATA, a prohibi e turista di continua cu su vacacion pa Aruba. Un asunto cu a haya atencion te den un noticiero di e canal di television di e ciudad ey.

Na Aruba, riba Facebook, e hefe di e departamento di permiso (DIMAS) Kathy Paskel, reaccionando riba e post di conocido periodista Dilma Arends cu a cuestiona e asunto, rapidamente a purba clarifica e situacion. Segun Paskel, tur cos ta claramente regla. “Nan no mester bin DIMAS” Paskel a bisa. Turistanan cu tin propiedad inmobil na Aruba y cu por comproba tal, por haya for di IATA / Imigracion mes na nan entrada como turista na Aruba un max di 180 dia consecutivo pa aña calendario, Paskel a sigui bisa. “E maneho keto bai ta vigente (no a cambia)”. Considerando cu e cambio di maneho di admision di turista, pa esnan sin propiedad a trece tambe pa e grupo ariba menciona incertidumbre, a y ta sigui tuma tur e pasonan necesario pa aclarea esaki, Paskel a finalisa bisando riba e post.

Pa loke ta e asunto di e mericano en cuestion, Eleonore Werbinski di West Warwick, tabata cla pa bay riba su vacacion. E tin timeshare na Aruba pa mas di 30 dia. Pero ora cu e a yega na e bali di e aerolinea en cuestion, US Air no kier a lague bay. Segun e aerolinea, e tabatin mester di un visa, pasobra e tabata kedando na Aruba mas cu 30 dia. Algo cu Werbinksi no tabata na altura di dje. A resulta cu ta trata di un interpretacion di e rekisito pa drenta Aruba, pero cu no ta trata di un rekisito cu ta demanda un visa. E aerolinea sinembargo ta para ariba cu e ta sigui e reglanan di e sistema cu nan ta uza cu ta TIMATIC. Y segun TIMATIC, e tabata bisa cu mester di un visa pa drenta Aruba si bo ta keda mas di 30 dia. E fayo ta cu berdad a haci e cambio di e politica di biahe, pero cu e cambionan na e sistema TIMATIC, no ta bayendo mes lihe cu nan lo tabata kier. Segun TIMATIC, awor ainda, un visa ta wordo pidi di turistanan cu kier keda Aruba mas cu 30 dia. (Wak e raportahe di television aki)