Luongo: Citgo na Aruba por bira manera Isla na Corsou

CARACAS – “E por bira algo manera Isla (e refineria na Corsou cu ta maneha pa PDVSA) of amplia nos strategia. Sigur e ta interesante pa nos y nos ta kere cu e por ta un oportunidad potencial”. Asina vice presidente di PDVSA, Jesus Luongo a declara awe na e agencia noticioso Reuters, riba e plan di Citgo pa cu posibel compra di refineria Valero. Manera ta conoci, Citgo, e unidad Mericano di PDVSA ta studiando e posibilidad pa restart e refineria na Aruba.

INTERES DI CITGO

“Nos interes ta pa reactiva e refineria. Ekiponan tecnico a wordo crea, due diligence lo cuminsa, y nos lo mira ki tipo di inversionnan ta necesario, kico lo mester wordo haci” Luongo a sigui bisa. Manera ta conoci, PDVSA ta doño, pero ta opera varios refineria y terminal di almacenahe den Caribe. Su presencia den e area a aumenta den ultimo añanan y e compania ta en busca di mas facilidad pa refina, ricibi petrolio importa y formula productonan petrolero pa exportacion.

ALGO MANERA ISLA

Den cuadro di esaki, Luongo a bisa pues esaki “ E por bira algo manera Isla (e refineria na Corsou cu ta maneha pa PDVSA) of amplia nos strategia. Sigur e ta interesante pa nos y nos ta kere cu e por ta un oportunidad potencial”. Mas detayes e vice presidente no kier a duna.

SITUACION CU VALERO

Un fuente na Valero mientrastanto bisa Reuters cu e no a ricibi un proposicion ainda. El a añadi cu e compania a bin ta traha ultimo lunanan pa sera e refineria su operacion pendiente, incluyendo e servicio industrial manera vapor, awa y coriente, pa fin di aña awor. Si e operacionnan aki para mes, e tankinan di almacena petrolio, den uso awor pa tanto Valero como PDVSA, lo keda operacional. Ora cu a para e refineria su operacion 3 aña pasa, Valero a bisa cu e lo a sigui busca un cumprado. Pa haya un operador nunca a wordo menciona publicamente, pero gobierno a discuti varios posibilidad, segun fuentenan serca di e combersacionnan.

ARUBA TA IMPORTANTE PA CITGO

Un fuente serca di ekipo tecnico di Citgo a bisa cu Aruba ta figura entre un di su proyectonan principal, den sentido cu e por permiti e compania como un compleho grandi di destilacion. E lo produci principalmente naphtha, cu lo wordo uza pa PDVSA como un diluente, y tambe materia prima di refinacion. E proposicion lo inclui tambe paga huur cu productonan di e refineria, segun e fuente a sigui bisa, cu lo reduci e gastonan di reactivacion pa PDVSA y Citgo.

DEADLINE

Manera ta conoci, fin di luna aki, gobierno di Aruba mester haya sa di Citgo, kico su intencionnan ta, y si nan ta mas serca di tuma nan decision of no. E ora ta continua e siguiente fase cu mester bisa nan pa fin di e aña aki, si nan enberdad ta bira e cumprado potencial di e refineria, y finalmente, mester negosha e ora cu e doño mes, esta Valero pa e deal final. Fuente: Reuters.