Parlamento conciente di posibel tardansa di presupuesto 2016

ORANJESTAD - Si presupuesto drenta despues di 15 di november (manera cu e situacion actual ta mustra), parlamento lo cuminsa cu e tratamento, pero lo haya mas bien menos tempo pa haci nan trabou riba esaki. E presidente di parlamento Marisol Lopez Tromp a splica NoticiaCla.com diamars cu esey tabata netamente e motibo pa pone e fecha menciona pa ricibi e presupuesto, pa evita cu manera tur practicamente tur aña, e parlamentario ta haya un presion pa keda cla cu e presupuesto na tempo. "Nos ta e ultimonan cu ta ricibi'e pa trata", Lopez a bisa. Tambe e mandatario a mustra cu no ta pasobra e presupuesto ta keda entrega despues di e fecha stipula, cu elo no keda cla pa e deadline di 15 di december proximo. 'No mas, ta keda menos tempo pa prepara su mes pa cu esaki. Esey ta berdad" Lopez a sigui bisa NoticiaCla.com. Di otro banda, ta durante di e reunion entre e presidente y e lidernan di fraccion, lo determina den e comision central kico e posicion lo bira di parlamento pa cu tratamento di e ley. 

DEADLINE DI PRESUPUESTO

Ayera NoticiaCla.com a splica caba cu mientras cu presupuesto pa 2016 di gobierno a yega Raad van Advies (RvA) caba, ta practicamente un hecho cu elo no keda cla cu ne prome cu 15 di november proximo (diasabra awor) , manera cu ta e plan di parlamento. Minister di finanza Angel Bermudez a confirma awe pa NoticiaCla.com cu e presupuesto porfin a yega RvA, y cu e conseho di CAFT tambe. Pues awor e ta completo. Informacion cu NoticiaCla.com tin, ta cu lo dura minimal un luna prome cu RvA keda cla cu nan trabou. Awe mainta ainda prome minister Eman a bisa prensa cu e tin tur confiansa cu e aña aki ainda e por wordo pasa y cu dentro di algun siman, RvA por keda cla cu ne. 

PLAN ORIGINAL

E plan original tabata, pa e presupuesto yega parlamento mas tarda diasabra awor (15 di november) pa e por wordo manda e siguiente dialuna pa miembronan di parlamento pa nan por cuminsa traha riba dje. E proceso ey por tuma por lo menos dos pa 3 siman di tempo, prome cu e keda cla y cu parlamento de hecho por trata esaki den un reunion publico. E diferencia cu antes, ta cu e biaha aki e presupuesto mester keda cla y aproba pa 15 di december, sino e ta viola e protocol di 2 di mei cu Hulanda y Aruba a acorda. Violacion di e acuerdo aki por nifica problema pa Aruba. Den pasado caba, gobierno di Aruba a priminti Hulanda cu e presupuesto lo keda cla. Y durante e bishita recien tambe, Plasterk a informa NoticiaCla.com cu el a avisa gobierno, cu nan mester cumpli cu esaki. FOTO Cortesia ArubaAriba.com