Alumnonan di EPI cu ultimatum pa solucion pa gymzaal

ORANJESTAD - Alumnonan di EPI cu a protesta awe mainta dilanti Bestuurskantoor, a duna gobierno (lesa minister Michelle Hooyboer Winklaar di enseñansa, te 13 di november pa un contesta riba e posibilidad di un gymlokaal. Si no haya un contesta pa e fecha ey, 'lo duna les pafo'. Asina nan a bisa den un carta cu nan a entrega na e minister encarga. NoticiaCla.com a tuma contacto cu e mandatario cu a mustra cu e respuesta awe mainta riba e peticion pa un gymzaal awor, tabata cu lo averigua kico exacto por wordo haci pa e alumnonan di EPI cu kier un gymzaal, y bolbe cu un contesta, aunke no tin fecha pa esaki. Esey ta e resultado di e encuentro breve awe mainta entre un grupo di entre 50 pa 70 alumno y maestro di EPI awe mainta na Bestuurskantoor. Interesante punto ta cu mientras cu un dia prome, e alumnonan a sigura cu tabatin un sin fin di problema cu mester di solucion, e unico punto di atencion diamars serca e mandatario, tabata esun di e gymzaal. 

ENCUENTRO NA BESTUURSKANTOOR

E alumnonan a bin topa cu e mandatario, acompaña pa e docente di gym, Andy Gomez, cu un carta, den cual nan a pone entre otro e ultimatum ariba. E mandatario no a reacciona mesora riba e ultimatum. "Mi a bisa nan cu mi no ta un persona cu lo bisa algo (djies pa bisa), pa despues bo bira bay y mayan resulta cu ta algo otro" Hooyboer a bisa NoticiaCla.com. "Pues e unico cos cu mi por priminti, ta cu lo mi traha riba un solucion si ta si of no, y bolbe serca nan mas liher cu ta posibel". Y ademas e mandatario a bisa cu e lo follow up cu directie Onderwijs pa haya un solucion di termino corto cu ta adecuado pa tur envolvi.

ACCION UN DIA ANTERIOR

Buchi di maestro y alumnonan hunto a yena dialuna mainta na Educacion Profesional Intermedio (EPI) na Playa, cu a pone cu pa un rato nan a bay den accion. Falta di un lugar apropia pa haci gym, a pone cu e docente Andy Gomez a dicidi cu ta basta dialuna mainta y no duna les mas. Su alumnonan (y resto di scol) a dicidi di sosten'e, cu a conduci den un accion rapido na entrada di scol. Durante intercambio di palabra entre docente, alumno y directie di e scol, a resulta rapidamente cu tin un lista mas di problema, y cu e asunto di gym ta djis e ‘punta di ijsberg’. E hefe di unidad di comercio, Anki Danker a splica e situacion, y a sugeri pa un bin cu un comision di maestro cu lo provee un lista di e problemanan. A keda di reuni awe merdia riba e problema di gym mes, y asina e alumnonan (cu poco resistencia) a acepta pa re-anuda les despues. E accion a dura mas of menos mei ora. FOTONAN cortesia ArubaAriba.com