Arubahuis: Ta solucionando problema di seguro di algun studiante

DEN HAAG - Gabinete di Aruba recientemente a sinta na mesa cu Insure To Study (ITS) despues di reclamo di algun studiantenan cu nan mester paga nan botica, dentista of consulta di nan docter di cas cash, mientras cu nan ta segura. Aunke cu 95 porciento di e casonan a keda resolvi, mester a bin cu urgencia un solucion pa e restante 5 porciento. Gabinete di Aruba a concorda cu ITS cu tur studiante ta ricibi den e siman cu ta bin un “garantie brief” di ITS cu ta garantisa cu e studiante ta segura. Esaki no ta kita afor cu por presenta un ocacion unda e studiante ta tende cu e mester paga na e momento ey. Studiantenan cu haya nan den un situacion semehante, mester yama ITS na e momento cu esaki pasa. ITS lo regla e asunto aki directamente cu e dokter of cu e botica. E mensahe cu Arubahuis a manda pa studiantenan ta pa nan tene na cuenta cu nan ta segura y niun dokter of otro instancia medico por nenga di duna nan e cuido of medicamentonan necesario.