Lider di MFK Gerrit Schotte ta exigi rectificacion di minister Navarro

WILLEMSTAD – Minister di husticia di Corsou Nelson Navarro tin 24 ora pa rectifica declaracionnan haci contra lider politico di partido Movimento Futuro Korsow, Gerrit Schotte, sino lo entama un caso sumario contra dje pa forza e rectificacionnan via un hues. Bufete di abogado Sulvaran y Peterson ta referi na declaracionnan haci di e minister den direccion di Schotte, unda cu segun e bufete, Navarro lo a insinua cu Schotte lo ta envolvi den e asesinato di politico Helmin Wiels di aña pasa. Navarro lo a haci e declaracionnan aki den dos entrevista separa, uno na television (programa Moru Bondia na Telecuracao y programa na Radio Direct FM) riba dianan 23 y 24 di juli, respectivamente. Si Navarro no rectifica, ta spera Navarro un caso pa daño y perhuicio cuantioso. Den e rectificacion (lesa e carta di rectificacion aki) , Navarro tin cu indica cu no tin ningun prueba contra Schotte y cu e declaracionnan aki ta causa daño na Schotte tambe.

Ta conoci cu for di siman pasa (Schotte tambe a admiti cu e la tende esaki) cu despues cu colega di partido George Jamaloodin a cay sera siman pasa, cu e siguientenan pa bay ta entre otro Schotte atrobe, cu ya caba a cay sera algun tempo pasa, pa un siman, pero pa acusacionnan diferente, y no relaciona cu e caso di asesinato di Helmin Wiels.