AZV y FEPO ta continua e trabou cu implante coclear

ORANJESTAD - Diahuebs 29 di october 2015 AZV y FEPO a bolbe firma contracto y asina garantisa cu lo continua cu e implantenan coclear. Un implante coclear ta un aparato auditivo pa personanan cu limitacion di oido asina severo cu ya nan no tin ningun beneficio cu un aparato di orea. E sistema di un implante coclear ta cu e implante ta salta e parti no-funcional den e cocolishi di orea y ta duna impulsonan electronico directamente na e nervionan di oido. Un implante coclear por wordo aplica riba muchanan cu a nace sordo of a bira sordo prome cu nan desaroyo di idioma. Tambe un implante coclear por wordo aplica cerca adultonan cu a bira sordo na grandi.

CON A CUMINSA

Tabata na aña 2011 cu FEPO a acerca AZV pa haya colaboracion pa e personanan cu limitacion di oido. E tempo ey no tabata posibel pa opera y haya un implante coclear na Aruba. Ambos entidad a traha hunto pa haci e operacion di implante coclear no solamente posibel na Aruba, pero pa haci esaki na un manera responsabel tambe. Awendia AZV y FEPO por mira bek cu satisfaccion. E pashentnan cu ta bin den remarca pa e aparato ta conta riba un bon structura di cuido, for di e screening, operacion, guia di e specialista y sessionnan di logopedia. Riba e potretnan por mira momento cu a firma contracto pa continuacion di e trabounan. Di parti di FEPO tabata presente señor H. Theysen (presidente) y señor dokter S. Cabenda (secretario). Di parti di AZV tabata presente señor drs. Anco Ringeling (director) y señora Noëlle de Jong (accountmanager).