SMOA: Salida miembronan RvT tabata mas lihe cu a planea

ORANJESTAD – Mientras cu e retiro di e miembronan di Raad van Toezicht siman pasa tabata planea, e la sosode mas prome cu planea. Esey ta e unico ‘sorpresa’. Asina SMOA oficialmente pa medio di u comunicado a informa awe. Manera ta conoci, diaranson cu a pasa, tres miembro di Hunta di Supervision di Stichting Middelbaar Onderwijs (SMOA) a entrega nan retiro. SMOA ta supervisa Colegio Arubano. Salida di e miembronan aki tabata anuncia caba, pero a tuma lugar mas lihe cu tabata planea.

REEMPLAZO DI MIEMBRONAN

Segun e comunicado, Hunta di Supervision lo yena e lugarnan di e miembronan saliente mas pronto posibel. Na mes momento lo tene cuenta cu salida di un di cuatro miembro dia 1 di februari 2016. Esaki ta conoci algun tempo pasa caba. Hunta di Supervision ta den combersacion caba cu esnan cu ta bay reemplaza nan. Na momento di yena e lugarnan cu a bin liber, lo tene cuenta cu resultado di e discusion si e Hunta di Supervision ta keda cu shete miembro of cu e cantidad aki lo bira menos.

TRABOU LOGRA DI RVT

Den e ultimo tres añanan Hunta di Supervision hunto cu gerencia di e scol a trata algun tema importante di cual algun ya a keda concretisa: a realisa un structura di control nobo na momento cu a adapta e statuutnan cu tabata anticua; e proceso financiero a wordo reforma loke a conduci na entrega na tempo di e cuenta anual 2014 cu aprobacion y presupuesto 2016; a start cu algun proyecto entre nan enseñansa den dos idioma y digitalisacion di enseñansa. Tambe a percura pa un sucesor di e rector como Presidente di Hunta di Gerencia. Banda di esaki Hunta di Supervision a yuda den duna guia na algun proceso di renobacion di enseñansa manera e conexion cu e protocol di Hulanda encuanto e exigencianan di examen pa HAVO y VWO y e conexion entre MAVO y HAVO.

STATUUT NOBO

E statuutnan nobo ta dicidi – den liña cu principionan di bon gobernacion - cu miembronan di un organo di supervision ta keda pa un periodo defini. Den e caso aki pa e periodo di tres aña. Cu miembronan di e Hunta di Supervision ta bay no ta nada straño. E cooperacion den e Hunta di Supervision y cu e Hunta di Gerencia ta bon. Tin un plan di maneho strategico 2015-2019 riba mesa cu hopi ambicion y Hunta di Supervision tin masha gana pa cuminsa traha hunto cu Hunta di Gerencia, organisacion y Minister di Enseñansa pa di e manera aki contribui positivamente cu enseñansa na Aruba.