Partido UPP a entrega keho na OM contra AZV, IMSAN, y specialistanan

ORANJESTAD – Partido UPP awe mainta a entrega un denuncia na Ministerio Publico, cu e peticion pa haci un investigacion real y profundo riba e actonan inapropia di specialistanan cu supuesto declaracionnan medico.

PREGUNTANAN

Despues cu for di aña pasa UPP a cuminsa haci preguntanan entorno e forma con cierto specialistanan tabata declara nan facturanan na AZV, cu AZV riba insistencia di UPP a laga haci un investigacion forensico al respecto, y alaves despues cu recientemente UPP a bolbe haci preguntanan riba e casonan aki y tambe riba un caso na IMSAN, tin indicacionnan fuerte cu tanto Minister di Salubridad, como AZV, Imsan y HOH, ta creando e impresion pa laga e hendenan aki "get-away with crime".

DENUNCIA

Pa evita esaki, UPP a entrega dialuna 9 di november 2015, un denuncia na Ministerio Publico, cu e peticion pa haci un investigacion real y profundo riba e actonan inapropia aki. Adhunto, prensa ta haya copia di loke a ser presenta na Ministerio Publico.

TRABOU

Segun su lider Booshi Wever, UPP ta spera cu OM haci trabou di esaki, pasobra mester bay un señal pa comunidad, cu no ta pasobra bo tin cierto funcion, bo por haci kico cu bo kier, y cu bo ta "untouchable". “Mescos cu e agente policial probablemente lo perde su trabao pa algo cu el a comete, cu no ta yega ni 1000 florin, con por ta cu mediconan cu ta haci actonan inapropia cu ta core den miles y miles di florin, AZV, IMSAN, HOH y minister kier sconde esaki y laganan "get away"? Ley pa un, ley pa tur!!” Wever a finalisa bisando.