Padrino: Avion militar Mericano for di Corsou a viola espacio aereo Venezolano

CARACAS — Venezuela ta reclama cu un avion di guarda costa Mericano a viola espacio aereo Venezolano den fin di siman. Asina e agencia di noticia Associated Press ta raporta diadomingo. E acusacion a bin di parti di minister di defensa Venezolano Vladimir Padrino, indicando cu e avion tipo dash-8 a sali for di Corsou, y cu durante un periodo di 30 minuut, e avion a drenta e espacio prohibi dos biaha, particularmente e area di ‘Los Monjes’ den un aparente mision di reconocemento. Riba e canal di television di gobierno Venezolano, Padrino a haci su declaracion diadomingo tambe (mira e declaracion aki).

BUELONAN SIMILAR

Segun Padrino a declara na otro prensa, un otro buelo similar Mericano a bula serca di Venezuela recientemente. E no a mustra ningun prueba, pero cu e momento di e violacion aki ta sospechoso. Esaki pasobra e ta concider'e maniobranan aparente, relaciona cu e proximo eleccion legislativo otro luna. El a recorda cu na 2002 tambe tabatin ‘supuesto entrenamento Mericano’ cu aparentemente a precede un golpi di estado breve contra e tempo ey, presidente Hugo Chavez. “Ta completamente inusual cu avionnan di e tipo aki, cu tur nan caracteristica di vigilancia yega serca di nos area di influencia” Padrino a bisa, indicando cu e portavion Mericano George Washington ta hopi cerca di Venezuela riba e dia di votacion 6 di december proximo. Embahada Mericano na Caracas y departamento di estado Mericano no a reacciona ainda riba e situacion. Mester corda cu e operacion for di Aruba y Corsou, ta di e asina yama Forward Operating Location, y ta pa primordialmente combati traficacion di droga den e region.