Ta spera claridad pa merdia riba situacion politico di Corsou

WILLEMSTAD – Un rato pasa miembronan di gabinete Whiteman a subi trapi na forti, pa un audiencia serca gobernador Lucille George Wout. No ta conoci si ta retiro a bay entrega of si ta un session di informacion esaki ta ainda. Pero despues di un fin di siman yena cu speculacion y reunion, e situacion politico na Corsou ta parce di lo conoce un cambio prome cu fin di dia. For di diabierna cu sra Marilyn Moses a retira su sosten na gabinete Whiteman, e gobierno ta uno sin mayoria, pues cu defacto a cay. Solamente cu nan no a entrega nan retiro ‘ainda’. NoticiaCla.com for di fuente Mariano Heyden a haya e informacion cu gobierno a cay, pero despues cu e gobierno no kier a acepta esaki. Segun e matutino Antiliaans Dagblad (AD), den curso di dia awe (hopi ta bisa merdia), prome minister Ben Whiteman lo entrega retiro di su gabinete na gobernador Lucille George-Wout. E intencion lo ta pa despues construi un otro tipo di gabinete demisionario. Algun speculacion tambe a keda aclaria na fin di e ‘weekend’.

SITUACION DI ETIENNE YS

Un di e rumornan cu a circula henter weekend, tabata cu ex prome minister Etienne Ys lo ta e candidato pa PAR pa bira minister di asuntonan economico. Diadomingo atardi sinembargo Ys mes a desmenti esaki riba su pagina di Facebook. “Mi no a wordo acerca pa e partido, ni mi ta disponibel tampoco” Ys a bisa entre otro diadomingo. Un ‘no rotundo’ di lider di e partido geel Zita Jesus-Leito diabierna pa forma un gobierno cu Pueblo Soberano, a resulta di tabata ‘un joke’ di dje. “E tabata un programa humoristico, pues ami tambe a haci tal’ Leito lo a declara. Esey a causa basta consternacion serca su seguidornan.

CONDICION PA LAPI GOBIERNO

Bek pa e matutino AD, PAR tabata kier (a cambio di duna sosten na e gabinete Whiteman) dos puesto ministerial, esta economia y minister plenipotenciario. Ora cu Pueblo Soberano a rechasa esey, PAR lo a bisa cu nan ta laga e demanda ey cay, basta Pueblo Soberano core cu e actual minister riba e funcion ey, esta Marveline Wiels. Ademas, nan lo kier e ora tambe e puesto ministerial di salud.

NEGOSASHONAN

E negoshacionnan ta wordo lidera pa ex minister David Dick y segundo secretario di PAR, Kamir Lopes. Awe merdia lo mester haya claridad riba e situacion tumultoso cu tin, y si enberdad, manera cu NoticiaCla.com a raporta inicialmente for di diabierna, e gabinete Whiteman ta acepta cu nan gobierno no tin mayoria mas y cu no ta keda nan nada otro sino entrega nan retiro. Foto gobernador ta cortesia Yves Cooper.